旅行分手實錄！三大高危嗌交旅遊點

一對情侶出外旅遊，絕對是二人關係的重大考驗，唔止一次聽過情侶外遊時鬧交收場，死因十居其九都係計劃不周，試過有對情侶歐遊時鬧交，鬧到要打番香港搵航空公司要求改機票返閨！

外遊鬧交計劃不周是死因

記得之前睇過一個Zuji外遊調查，當中有一條題目幾有趣，原來不少受訪者都認為情侶分手的高危旅遊地點是中國（28%），第二位是日本（16%），巴黎第三位（11%）！

呢個結果都幾中，唔少姊妹聽到男友提議返大陸就藐，加上貪就腳近近哋返大陸玩嘅情侶多、基數大，鬧分手數目多都唔出奇。不過巴黎咁浪漫都入選，唔通真係期望愈大，失望就更大？

浪漫落空廈門迫過上水

返大陸中伏的情況特別多，我聽過以下故事，都幾無辜。有位姊妹E曾經哭訴，話說佢同男友趁短周末去廈門旅行，一心諗住廈門係悠閒小鎮hea幾日，點知廈門近年在內地都很火熱，陸客不絕，去到邊都係人，情況仲慘烈過廣東道，原先男友諗好晒嘅行程都去唔到；之後有一日入鼓浪嶼，人多到迫唔到船返出廈門咁滯！結果全程二人都嬲爆爆，黑面返香港！

歐遊考EQ！提防小手傷感情

大陸之外，日本入選第二位一啲都唔出奇，皆因瘋狂購物後現形者眾，都好易理解。但巴黎都入選，我估原因可能係近年賊仔猖獗！歐洲經濟差，扒手四出搵食，大家去意大利、西班牙慣咗提防小手較少人中招，點知近年聽得最多中伏案件都發生喺倫敦同巴黎，雖然係意外，但冇晒現金信用卡都幾煩，令人煩躁心火盛，容易鬧交都不足為奇。