間中有朋友話行山行到悶,就想搵啲另類玩法,於是,有班朋友近年轉玩山澗。佢哋話, 行澗 涉及體力鈠鍊、基本攀石、定向技巧。而最重要是,溯澗極重視團隊合作,比起一般行走山徑「各有各行」,更為熱鬧,甚至更熱血。佢哋知我對於行山澗 嘅經驗是零,就推薦咗 3 條 一星級山澗 :

1. 雙潭石澗

雙潭石澗,為大潭水塘與大潭篤水塘中間的一段流域,澗道寬敞平緩,易走易行

路線:乘車至大潭篤水塘,沿水塘道步行約十五分鐘,接大潭中水塘壩底進入山澗。沿山澗而上,終點為大潭水塘主壩,可選左方或右方撤離 (顯示地圖)

需時:2 小時

注意:澗頂為大潭水塘水壩,雨季水壩會放水,山澗變得相當危險

2. 老虎坑 (又名虎地坑)

位於屯門九逕山山腳,藍地水塘 (又名老虎坑水塘)上游。山澗傍有廣闊晨運徑,可選擇行山或溯澗而行。

路線:由屯門藍地福亨村道,道路盡頭的石礦場上山 (石礦場內有指示)。(或由富泰經虎地上) 經水塘水壩進入山徑,沿山徑步行15 分鐘到山澗。玩完山澗可選擇登九逕山,最遠可達大欖,或不登山而沿屯門徑回景峰 (顯示地圖)

需時:1 至 5 小時 (視乎撤離路線)

注意:澗內有多個水坑,但為沙土地,嬉水時會有沙土

3. 梧桐石澗

全港最高最長嘅瀑布,更有系列不同大小形式嘅瀑布。不過因為瀑布群太多人去,所以當局開辟正式山徑。即係話,去梧桐石澗並非真正溯澗 (要溯澗就有超高技術及準備),而係行山徑,不過都可以體會一下山澗之樂

路線:由林錦公路梧桐寨郊遊徑起步,依山徑指示前進即可。可原路撤離,若體力許可,可繼續上大帽山,由荃錦坳走或鉛礦坳走 (顯示地圖)

需時:2-3 小時 (原路走)

注意:雖說呢到有正式山徑,不過上石澗極需體力,要量力而為。而在雨季時,瀑布大水而產生霧氣,反而乜都睇唔到

行澗須知

裝備 (部份裝備為溯澗而設,可因應需要而增刪)

1. 鞋

  • 盡量穿著底較軟,並於鞋底有排水孔嘅山澗鞋
  • 注意鞋嘅防跣能力(高手話,鞋底用生膠造最好
  • 唔好著行山鞋,因為底硬,且濕水後排水能力低

2. 毛巾

  • 濕水後抹身之用
  • 抹汗

3. 求救哨子
4. 繩:遇有困難路徑,用來借力攀爬
5. 電筒

  • 山澗路線多要穿越谷地密林,或需電筒照明
  • 山澗路線易迷途,以防行到天黑

6. 防水:電話、替換衣服要注意防水
7. 另加一般行山裝備:如糧水、急救用品等
8. 若要溯澗而行,不用帶行山杖

其他注意事項:

  1. 路線計劃
    新手:由下面爬上山澗,再由山上行山路走
    高手:由澗頂爬去底方
  2. 留意天氣,注意突然而來之大雨;而暴雨過後的一兩天溪流仍有大水
  3. 留意水潭會否為村落之食水
  4. 新手溯澗,必須由經驗豐富之老手帶領
  5. 玩時玩,唔好跳水,真係會死人