喺香港,好多男仔都會覺得識煮嘢食嘅女仔好吸引,但佢地唔覺得呢個係一個must,反而係bonus!而相對嚟講,男仔識煮嘢食就更加係驚為天人,甚至可以被賜封為男神(不過前提都係要靚仔,sor)!我想話,喺英國或其它西方國家,無論你係男人定女人,識煮嘢食根本就唔係咩優點,而係身為一個成年人基本應該擁有嘅自理能力而已!

喺英國生活嘅一年間,我嘅廚藝可謂越級大躍進,依家嘅功力僅次於Gordon Ramsay。而追溯返點解我呢D 死港女從前會完全唔識煮嘢,就要歸根返我嘅成長背景:

#01 //地獄廚神之育成

我係成長喺一個食快餐大嘅家庭,家母煮飯好叻但係佢好鬼懶,早午餐一定唔煮;加上佢好憎人搞佢廚房,即使我細個睇完方太戴住老蓮咁大隻鑽戒醃雞之後啟發左我煮食嘅興趣,但因為家母唔比人涉足佢廚房呢個神聖嘅地方,我由細到大根本就冇機會煮過嘢食。

#02 //抵賴過後才知衰

係,賴得就賴,吹咩。於是嚟到英國,見盡來自歐洲日韓嘅flatmates 每日將簡單嘅食材從容地玩到出神入化,而我就經常煲公仔面或者求其將幾樣食材炒埋一碟算數,相當慚愧。

#03 //一場心血餵飼地板

上個禮拜仲衰,辛苦煮完一餐一個唔該跌曬落地請個地板食,弱智冇下限。但大家有冇發覺日本D 動漫/劇集D 女主角總係笨手笨腳同煮嘢難食嘅呢?然後大家就定性佢地呢D 特質為可愛同粗線條,話唔定呢個就係現代亞洲女仔唔識煮嘢嘅遠因!

#04 // 上網苦練”階段勝利”

依家我最大嘅興趣除咗飲飲食食,就係睇教人整嘢食嘅video!特別係嗰D 好快手、剪接到一分鐘完成嘅菜式,challenge accepted ! 以前覺得煮嘢食好嘥時間,依家覺得呢種嘥時間其實先係真正嘅生活。不過說穿了始終都係因為倫敦出街食太貴,又難食,所以大家都匿埋喺屋企日煮夜煮,卒之人人都變咗廚神囉。