前幾日同朋友食飯, 佢話佢剛去完歐洲返嚟，影咗好多相。
身為旅遊界(偽)浪子既我當然好想聽下佢嘅經歷, 同埋影咗啲咩相啦！
「嗱，呢度咪Pisa囉！」
「喂喂咪住先, 我記得呢幅我都影過喎！」唔知點解喺我既觀念入面，冇推冧過比薩斜塔, 千奇唔好話俾人聽你去過Pisa! 當時我就係抱住呢句金句, 係比薩斜塔前面影左十幾分鐘, 又推又挨又頂又拉, 最後就影左一埋低低能能既相。
「咦咦, 呢幅我又有bor！」見到佢企喺巴黎鐵塔對開個草地，一隻手指就篤住巴黎鐵塔個頂，成個巨人咁款。
「哇邊個咁抵得諗肯扒爬係度幫你影呀?」雖然表面上笑緊佢，但嗰啲肯又扒又跪喺度幫自己影呢d白痴相嘅朋友真係唔話得。
打開 harddisk 總有「#柒到唔敢睇」Moment
返到屋企忍唔住打返開個hardisk睇，發覺原來差唔多每一趟旅程，我哋都影過一d旁人睇落好低能白痴，但我哋影嘅時候好開心， 甚至係之後睇返都會笑住話「#柒到唔敢睇」嘅相！
去泰國既時候，你有冇試過扮沙華dee cup同麥當勞叔叔影相？ 我就有啦， 泰國嘅麥當勞叔叔有好多pose，坐嘅相企既彎腰嘅相都有，同埋原來世界上得返泰國係仲有麥當勞叔叔了……
你有冇試過係大阪心齋橋上學個跑步公仔既姿勢影返幅合照？ 記得我影嗰日人山人海，橋上嘅人來來往往，但係好奇怪都冇人望住我，原來我一望後面，都有幾對男男女女同我一齊擺呢個pose，唔講真係以為馬拉松Get Set Go！
一路睇, 一路個腦就諗： 「頂！ 點解我以前會影埋d咁嘅相！」不過睇完之後成個人都輕鬆咗好多。風景相唔係唔靚, 但少咗人， 硬係覺得差緊啲嘢， 反而最柒最低能嘅相， 往往會成為成個album入面最好嘅回憶！