全部真人真事,準備好未?請俾趣!

無知問#01:喂~有冇平機票呀?

畀面答:有啊你去xx 航空公司個網睇下,個 Fanfare 啲機票好似廉航咁平㗎!
真心答:你以為平機票係 Membership Card咩,唔係我話比你就比你㗎。

無知問#02:咦,你飛開邊條線?

畀面答:哈哈… 我邊度都會飛吓…
真心答:其實無話飛邊條線,公司編你飛邊度就邊度,度度都有可能要飛,無得你揀的。不過某啲公司容許員工與員工對調更表,有人肯同你調就可以飛啲你 prefer 嘅地方喇,不過無人保證你個個月都搵到有人同你調㗎吓。

無知問#03:嘩!做空姐人工好高個喎!

畀面答:(無奈苦笑)哈哈哈… 都Ok啦…
真心答:其實初入職嘅空姐絕對有條件申請公屋架,多晒~ 或者你可以睇睇呢度(編按: 按此閱讀:空姐人工$54 時薪)

無知問#04:係咪有人幫你哋化妝set頭架?

畀面答:無架… 要自己化妝同札頭架~
真心答:你以為空姐係藝人?明星?我結婚擺酒果日就有嘅哈哈哈哈。

無知問#05:飛韓國即日來回時被樓下看更問:正啦!今次去邊玩呀!

畀面答:韓國呀… 哈哈哈…
真心答:可以喺飛機比客玩,多謝。

無知問#06:飛長途機,個大陸客問:吓!原來你哋喺飛機有得瞓覺架?

畀面答:哦~係呀!唔好意思遮遮丫唔該。
真心答:原來你覺得空姐唔使訓覺,不如下次你問:吓!原來你哋要去廁所㗎?吓!原來你哋要食嘢㗎?唔好阻住我訓覺好唔好,攰到瞓低喇我就嚟。

無知問#07:我聽人講空姐成日去浦,係咪真架?

畀面答:哦~其實呢啲嘢係好個人嘅~ 浦唔浦同你做咩職業係無關~
真心答:我識啲空姐(包括我)浦得最多就係屋企,信就信,唔信就繼續自己 FF 啦吓。

無知問#08:空姐可以做到幾多歲?老咗之後係咪轉地勤?

畀面答:其實做空姐同做一般職業無咩分別,可以做到 55 歲先退休。空服同地勤除咗套制服係一樣之外,做嘅嘢、所受嘅訓練係完全唔同,唔係你話轉就轉的。

真心答:其實飛機好多老空姐架(嘩得罪晒啲阿姐),得閒留意吓丫。

無知問#09:你就好啦,放咁多日假,去邊玩呀?

畀面答:哦~無呀哈哈哈都係喺屋企抖下咁啦。
真心答:你試下 jetlag 無限 loop 嘅感覺就知你淨係想喺屋企 hea,電話都唔係好想聽。

無知問#10:我想問呢,我去(請代入任何國家)可唔可以帶 xx 入境架?

畀面答:(google完)哦~唔可以呀!因為當地海關規定……
真心答:地勤同事都未必即刻答到你啦, google is your friend bro。

Bonus 無知問:飛台北即日來回?好快啦下嘛?兩三個鐘收工啦。

畀面答:其實都由朝到晚㗎~ (不過總係無人信)
認真答:不如我計計條數俾大家睇:
1. 公司喺東涌,乘車時間 1-2 小時不等(視乎你住喺邊)

2. 我地需要起飛前 1.5 小時返到公司
3. 香港台北飛行時間為 1.5 小時
4. 飛機到步後需要大概 1 小時去做安檢、清潔、維修等
5. 飛返香港 1.5 小時
6. 落客 0.5 小時
7. 乘坐公共交通工具回家,1-2 小時

結論:飛一轉台北大約需離開屋企 10 小時。

拿,仲有咩想知?我樂意真心答,不過唔準嬲嬲豬架!多謝晒~