首先大家要知道點解要去踩「鐵道自行車」先。

原因好簡單,因為睇完《Running Man》,見到一班主持好辛苦咁喺條鐵道上面踩,所以大家都想試吓去踩。其實唔單止香港人湧住去,節目播出之後連韓國人自己都想去辛苦一下。

我女朋友亦係其中一個,亦放入今次旅行嘅行程入面。

但亦因為現在鐵道車實在太受歡迎,所以唔想去到無晒位摸門釘,最好就預早幾日前預約。作為遊客唔識韓文可以點呢?其實只要去啲「遊客服務中心」,佢哋就會幫你預約。預約係唔洗錢嘅,但你一定要準時到達再買票,否則個位就會讓畀其他人。

點解我咁講呢?因為我遲到……

 

本身睇個地鐵路線圖,已經見到「金裕貞站」離我住嘅新村好遠,所以特登預早兩粒鐘出門口。但計劃總係趕不上變化,首先當日我唔知醒,女朋友化妝又「得啦!好快啦!搞掂啦!出得門口喇!」結果等咗成廿分鐘先出到門口。

諗住地鐵好快啫,個半鐘應該去到嘅。點知連埋轉幾程車,中轉站地鐵又停好耐。我足足遲咗成粒鐘先到……一出到地鐵站其實已經望到場地,完全唔洗搵。

「遲咁多,證明就算準時出門口都一定遲到……到時咪仲激氣~」我安慰女朋友。
「如果全日Full晒,你就一定Dead Dead!」女朋友。

 

當日我預約十一點,十二點幾先到。結果最快要到四點先有位…
總算叫有位,保得住條命仔……

仲有咁多時間去邊好呢?
「呢度好近『春川』,我哋去食真正嘅春川炒辣雞啦~去旅行最緊要識靈活變通,如果遇到少少阻滯就影響到心情,就唔抵啦~哈哈。」我嘗試平息女朋友怒氣。

搭幾個站去到春川,去到一條專門食炒辣雞嘅街。見到真係成條街都淨係得炒辣雞食,到底食邊間好呢?無可能嚟到春川,都食返新村嗰間分店嘛,最後由街頭行去街邊,決定望到合心水就入去……

估唔到個炒辣雞又真係幾好食,雞嘅份量同芝士都多過新村嗰間好多,辣味都好夠。係係係!我知道食炒辣雞最後要食個炒飯先算完美,但……真係太大份,最後連個炒辣都食唔落。

食到全身都油煙味,最啱就係去鐵道車兜一兜風。又搭返去「金裕貞站」,今次預早到達成功上車…

老實講,一開始成排人咁喺路軌踩住架鐵道車都幾過癮。但亦老實講,沿途風景唔算十分之靚,仲有啲攰添…

「點解好似愈踩愈難踩咁嘅?」我問。
「你攰啫。」

呢個時候,我瞟到女朋友隻腳…放空咗。佢完全無踩!
「喂妳做乜唔踩?」
「呢部車畀兩個人踩嘅用意,就係畀我哋輪流休息嘛~」
「係咩?咁我休息陣先,好L攰啊大佬…」

我雙腳停止咗無再踩…
無耐我感覺到架車速度減慢…

「妳做乜唔踩…?」
「踩緊囉!」
「妳分明揸流攤!踩得咁慢!」
「好攰啊!我驚踩到腳痛聽日行唔到街。」
「妳黎之前睇《Running man》明明話好想玩!」
「原來真係好攰,我想靜靜哋睇風景~」

我踩到成身汗,佢竟然想靜靜哋…睇風景…

結果,我獨自踩晒全程!攰到hihi之餘,雙腳仲有少少抽筋,終於死撐到休息站,原來因為鐵道車人流急升,上年已經變成單向行車,仲縮短咗距離,去到休息站就有火車載你去終點。

去到終點,跟住人流坐免費shuttle bus返去「金裕貞站」,再坐地鐵回程出市區,呢兩粒鐘車程我全程都瞓到隻豬咁。

「下次再嚟嘅話,我決定要踩單人車!由得妳自生自滅!」
「好啊~我坐前面架車,你坐後面,你推我行!」

心諗,下次都係唔嚟…


ig:BlueGodZi

專頁:http://www.facebook.com/BlueGodZi