大阪USJ 15 週年除咗有新機動遊戲,仲有好多好嘢玩!其中一樣必玩嘅就係位於Universal Wonderland 附近,15 週年市集內嘅一部 3 米高汽水機你冇睇錯,係 3 米高!無論入錢位及按鈕都「高不可攀」,要跳高或騎膊馬才能撳制,眼見少女冒著走光危險都要挑戰,就知有幾值得玩!

1) 玩一次要幾錢?

呢部汽水機玩一次要入 300 円,然後會有 2 次機會畀你挑戰!啫係你最後可以得到 2 支迷你可樂

2) 教你 3 大成功招式

a.原地起跳

據編輯現場觀察,可以喺原地跳起而成功嘅人可以話非常少!當日編輯喺汽水機前逗留約 15 分鐘,都只係得一位男士可以做到!

b. 衝吧!為了可樂!

要跳高,又唔想借助外力,最基本做法當然就係靠助跑啦!向汽水機直衝、一跳、撳、成功!

c. 出外靠朋友,搵人幫手最實際!

如果靠助跑都唔成功,就要搵幫手啦!你可以搵個人肉腳踏幫你上;又可以搵人借個膊頭畀你騎上去;當然,最勁嘅就係 call 齊班兄弟疊羅漢畀你上位啦!

編輯問過玩完嘅朋友有咩感覺,佢哋話上到去原來都真係幾高架!不過就真係好好玩,現場嘅朋友又會幫大家打氣,氣氛相當唔錯!編輯見條隊冇停過,不過大家都玩得好快,所以等嘅時間唔算太長,想玩嘅記得準備定 300 円挑戰費啦!

下一頁:睇埋 15 週年6大Check Points

延伸閱讀:

大阪環球影城15週年QnA

大阪環球影城15週年必買10款手信!

飛天翼龍過山車 試玩報告!