韓國自從掛咗紅色旅遊警示到落波甚至到依家,減價戰都一浪接一浪,尤其係連十年都唔減一次嘅港龍濟州都有得平!所以小編就同大家update咗個 韓國機票 平飛攻略,話你知幾錢先係入手價!咁就唔使下下嚟問我畀我唞下啦^_^

註:以下所提及的價錢為來回連稅價錢,個別廉航未包寄艙行李費,以淡季作標準。價錢及建議是小編個人之經驗,只作參考用途。

最低價:過去一年以來嘅最平價錢,可遇不可求。
入手價:搵機票嗰陣見到呢個價都叫做唔錯,買得過。
正常價:平時冇優惠做緊嘅正常價錢。

首爾機票分析

首爾自上年起一路都進行緊減價戰,國泰、韓亞、大韓,三間出名質素好嘅航空公司任你揀,預早訂嘅話,航班時間選擇好多。

尚餘三間傳統航空公司埃塞俄比亞航空、印度航空同埋泰國航空,價錢一向唔算特別平,可以唔使睇。但有時如果係公眾假期出發,反而會有驚喜價!

至於廉航方面,有三間包寄艙行李嘅濟州航空、真航空、易斯達航空。濟州航空有凌晨機去晚機返,大約一個月一次優惠,入手價為$1,200,不過濟州航空前排改咗玩法,有啲優惠係唔包寄艙行李,只係包10kg手提行李。而有需要可買寄艙行李,每件15kg $200,但超過15kg當超重計算,每kg收費$85 / KRW 8,000,都幾貴。而真航空及易斯達航空只有下午去早機返嘅航班,除非冇得揀先考慮。

而HK Express 一日有三班航班,成日都有優惠減價,約兩星期一次,入手價為$1,000 左右。

***結論:

1) 想坐傳統航空嘅話,建議盡早買國泰韓亞大韓,依家呢個價都差唔多係最低價了。
2) 嫌唔夠平?捕實濟州航空及HK Express 嘅優惠,計番行李,條數平多$500左右。
3) 而其他航空公司基本上唔使睇。

釜山機票分析

飛釜山玩得最盡嘅航班時間會係釜山航空及大韓航空,凌晨機去晚機返。大韓航空依家有隻全年優惠,最平$2,300 左右,包行李及飛機餐,呢個價相當抵買。釜山航空一個月出一次優惠,價錢由$1,600至$1,900 不等,但平飛數目比較少。至於港龍,雖然依家都有優惠,但航班時間為凌晨機去早機返,可以忽略。

HK Express 飛釜山時間為早去午返,優惠大約兩星期見一次,平飛數量同樣多,想最平飛釜山嘅話,主打呢間啦!

***結論:
1) 要搭傳統航空,依家買大韓。
2) 想平啲就等HK Express 優惠。

濟州機票分析

仲有另一個熱門航點濟州,直航傳統航空只係得港龍一間,依家連稅$2,500 左右已經好平喇!另外亦可搭廉航HK Express 去,不過要凌晨機去朝早返,但係HK Express 每次做優惠嗰時,濟州都放得好少平飛,所以入手價預$1,300左右。

下一頁:首爾必5大夜宵磨好去處

延伸閱讀

首爾 Aland 7大藥妝雜貨

首爾10個呃Like美食

3 個往返仁川機場方法