入住銀河二期想飲飲食食,除了商場內叫不出名的貴價餐廳,仍有另一新選擇 - 百老匯美食大街,無論本地老店、街邊小食,還是過江猛龍通通齊集,一齊睇下採訪當日的店舖精選!

1)本地老字號

杏香園甜品店
「杏香園甜品店」於澳門開業 40 多年,為價格較高的傳統老店,亦有不少自創左撈右搭之甜品,唯採訪時查看餐牌,只見傳統甜品類別,如果想試芒果盅雪糕、龍耳雪耳等甜品暫時仍需到清平直街先有。

榮記荳腐麵食
與杏香園相鄰的「榮記荳腐麵食」以豆類製品著名,於大三巴附近同樣開業數十年,經常出現在各大旅遊網站書籍,老實外表但食落內涵十足,食荳腐時以為食梗荳腐花,滑到無朋友!

既然坐落銀河新地段,價格自然比老店昂貴,熱荳奶$8/杯,熱荳腐花$10/碗,荳腐麵$25/碗。

華生行
於新橋高士德以龜苓膏打響名堂的「華生行」不但龜苓膏用料上乘,湯水燉品亦非常足料,採訪當日要是編輯來遲幾步就無湯飲!

 

2)過江猛龍

家.曲奇
從新加坡遠道而來的「家.曲奇」主打手製撻、曲奇和月餅,其榴槤月餅於香港大受歡迎,加上香港現時未有門市,當作手信都無問題。

度小月
眾所周知台南「度小月」以擔仔麵聞名遐邇,可惜當日編輯去到已經賣光,未有機會一試以作比較。傳統細碗擔仔麵只賣$15,難怪開幕後一直大排長龍。

 

3)米芝蓮系列

皇冠小館
獲 2015 米芝蓮推介的澳門本地代表「皇冠小館」從水坑尾進駐氹仔,傳統蝦子撈竹昇打麵與招牌蟹粥繼續坐陣新店,令兩位特派員粒聲唔出食至忘我境界。

以後喺氹仔食蟹粥有新選擇,盛惠一位 $165,半鍋 $280,一鍋 $480。

阿鴻小吃
米芝蓮常客「阿鴻小吃」對香港人熟悉不過,雖然菜色選擇現時較香港為小,但價格相約,若未能到觀塘、機場重溫舊店味道,而家去澳門都有得食!

 

4)特別推介

德仔記
百老匯大街上除了餐廳店舖林立,亦有不少街頭小食,而編輯不得不特別推介車仔檔「德仔記」的炭燒砂煲奶茶。沖奶茶沖足三十多年的羅師博話茶底秘方以多種茶葉配搭而成,至少拉 8 次以上,難怪濃滑俱備,為編輯的雨中採訪帶來絲絲溫暖。