上篇 香港山野天梯大全 出街後,唔少讀者都有分享佢哋心目中嘅「真 天梯」,今次再講5條 香港山徑天梯 。如果大家仲有其他推介,歡迎繼續分享。

01 | 全港最強:孖崗

級數:約3,000級 (上山及下山,網友話佢真係數過。)
位置:衛徑第1段
建議路線:赤柱峽道 > 孖崗山 > 淺水灣坳 > 紫羅蘭山徑 > 黃泥涌水塘
上山難度:4星 (5星最難)
簡介:一開始就要急上386米嘅孖崗山,長長嘅樓級,絕對係體力大考驗。但可以遠望赤柱及鶴咀,撞啱季節沿路又有茶花欣賞,咁辛苦絕對值得!

02 | 夠原始:黃龍坑郊遊徑

級數:超過2,000級
位置:由黃龍坑道起步,沿郊遊徑可到達二東山。
上山難度:3.5星 (5星最難)
賣點:網友精選,穿梭二東山之山谷,物種豐富 (夏天多蚊蟲)。沿途可遠望二東、大東,甚至鳳凰山水道嘅瀑布,相當有原始氣息。

03 | 開揚景觀:西貢東洋山

級數:超過1,000級
位置:衛徑4段,井欄樹起步,可達飛鵝山道。
上山難度:3星 (5星最難)
賣點:網友精選,由海拔約100米直上500多米山頂,沿途可欣賞九龍、將軍澳及西貢的遠景。

04 | 長樓梯:九龍坑山

級數:約1,500級
位置:衛徑8段,由大埔頭上沙螺洞,然後走天梯上九龍坑山。終點可以係流水響或鶴藪。
上山難度:2.5星 (5星最難)
賣點:「天梯」嚟講,佢都算友善,因為梯級唔係太巨型,密密步咁上,都唔算困難。

05 | 玩濕身:梧桐寨

級數:不詳 (爬升600米。)
位置:林錦公路萬德苑起步,分岔路右邊係天梯 (3.7公里),左邊去梧桐寨瀑布 (4.5公里),終點係四方亭,再上係大帽山山頂。
上山難度:3.5星 (5星最難)
賣點:穿越瀑布嘅樓梯,確係好特別。

香港山野天梯大全(上)》出街之後反應好好,多謝!對一個行山作者嚟講,最開心係見到啲留言,只係tag人名,然後一副「R山行」嘅態度。當一篇文可以引到大家去行下山,已經算係成功咗!

而呢次更開心,就係唔少朋友好踴躍提供天梯嘅資料,估唔到「人人心裡都有一座天梯」。我山雞自問才疏學淺,真係要靠大家提點。呢集完咗,大家覺得有咩講漏,歡迎繼續留言提供!