最近行過果欄，發現不少日本士多啤梨做緊大減價，皆因其當造季節已經接近尾聲，欄商都實行減價益街坊，讓大家把握最後機會食平靚正士多啤梨。價錢一劈再劈，由上星期賣$100一箱，到今個星期$90一箱兩盒，超抵！港人最愛的甜王、熊本士多啤梨等多款品種都有減，即睇以下幾款精選品種。
撰文及攝影：ning（原文刊於《新假期》）
迫爆！果欄日本士多啤梨大減價
日本士多啤梨的當造季節，一般都是每年11月開始，到2月底結束。記者問過欄商，雖然已踏入三月份，但近日依然還有不少日本士多啤梨到貨，品質也佳，酸甜有致的味道都符合港人口味。
貨量多，自然可以平價益街坊。不過欄商也提醒，始終是季尾，貨量也會相對浮動，隨時賣晒就冇，所以大家都要把握最後last call機會買日本士多啤梨了！
假日的果欄已經夠人山人海，遇上日本士多啤梨大減價，更是多人過年宵！針都插唔入！
減價品種逐款睇！
果欄現場所見，價錢的確一減再減，上星期最平$100一箱兩盒，剛過去的周末再去巡視，竟然再跌至$90一箱兩盒，比起超市依然賣緊$150一箱，絕對係「黐線價」！而且頗多品種都有減價，以下幾款就最抵。
福岡甜王
最多人認識的日本士多啤梨品種，味道濃香而甜，但亦帶少酸，口感腍滑。雖然踏入季節尾聲，但依然飽滿大粒又紅潤。
熊本熊紅
來自熊本縣，粉紅色的搶眼紙盒，包裝上更有熊本縣吉祥物Kumamon熊本熊的可愛樣子，fans必買必儲必食！賣相圓潤肥美，就如Kumamon一樣，味道也香甜多汁。
熊本戀實士多啤梨
2017年新登陸的品種，口感較為爽脆，果肉為奶白色至淡櫻花色，粒粒皆為心形，酸甜平均。
佐賀穗之香
佐賀人氣士多啤梨之一，認住包裝紙上的日本LICCA娃娃即可。水滴形狀夠可愛的骰，賣相鮮艷亮紅，食落酸甜有致，士多啤梨香氣也頗突出。
長崎夢之香
口感比一般士多啤梨結實，飽滿多汁，因為臨近完熟才收割的關係，每粒都是鮮艷紅色，味道甜美帶少酸。