搭飛機或長途車，最佳節目就係瞓覺。我自己好憎用U形 頸枕，因為唔鍾意頸後有嘢頂住，舒服姿勢更加可遇不可求，chok到頭搖又尾擺，一覺醒來仲要頸梗膊痛，安美露都冇用，寧願眼光光狂等落機兒。近來有兩款未正式推出市面的旅遊睡眠 頸枕，睇落都幾實用。
01 | 托你下巴頸箍
號稱為「The Ultimate Travel Sleep Solution」的Nodpod，原理似頭部的吊床，用法係綁住椅子的頭枕，軟墊承托住個下巴固定位置，等你個頭唔使左搖右擺、上下釣魚或情不自禁挨落隔籬位個香肩上。雖然外形有點似整親戴的頸箍，甫士又怪咗啲，勝在夠細，hand carry都好方便。配件The Pod係一件防風防水的外套，有橡筋畀你笠實個頭及袖位，代替飛機上萬人着用的污糟毛氈。着上身雖然稱唔上靚仲有少少騎呢，甚有去salon剪髮的感覺，但咁實用，真心想買喎！Kickstarter最平售價已沽清，現單買頸箍US$32/HK$248，連氈套裝US$57/HK$442。（照片來源：www.thenodpod.com）
02 | 能屈能伸廁所板
呢個廁所板形的 頸枕 ，有摺位可以屈曲成唔同角度，中間通空似按摩床的枕頭位，助你呼吸暢順真使得舒服晒。一個枕頭，四種用法。第一，當普通U形 頸枕 套住後頸，適合淺睡。第二，可以夾在頸邊側睡。第三，放在枱面上伏低，雙手可套在中間。第四，套在頭枕後，承托頭部及上身，適合深層睡眠。最後的姿勢怪相到似足飲醉酒在廁所劏的模樣……但可以瞓到咁多花式，真係大開眼界。Kickstarter同樣被搶購一空，最平AUD39/HK$230。（照片來源：www.facecradle.me）