夏天為大地帶來雨水……同埋其他惡劣嘅天氣……仲有打風!當大家成為一個馬迷並不斷呼叫8號!8號!嘅時候,機場職員就成為唔想個風打得成嘅一小撮人。當然仲有就係要出國去玩嘅旅客啦!倘若你咁唔好彩,起飛當日撞正打風,咁點算好呢?又或者你去嘅目的地好似呢排日本咁成日打風,可能會遇到咩情況呢?

天氣惡劣搭飛機注意事項

01|航班取消、延誤 留意手機、電郵、網頁公布!

不過就算 8 號波都唔一定飛唔到,3 號波又未必飛到。留意手機、電郵、網頁公布!飛機起飛、降落與風向有極大關連,所以唔使咁早打定輸數。(有興趣就睇下啲機師blog。)

留意天氣報告,仲有訂位時留低常用電話及電郵,航空公司一般於公布後會發放SMS及電郵(人在外地換咗SIM卡就記得睇e-mail)通知最新消息,早人一步知道延誤、取消,打電話改機位係好重要嘅事,因為你想改嘅日子或目的地剩低嘅機位可能不多,早人一步就理想達到!

坦白講,航空公司通常盡可能不會取消航班(始終涉及盈利問題,商業社會嘛),可能會延誤若干小時,待天氣好轉後再起飛。不同航空公司有不同改票規則,有啲可能會以延誤時間嘅長短去決定可否退款、改日子、改目的地之類,收費與否就視乎航空公司指引。

留意電郵內容,耐心等候電話接通 ( 一隻機cancel可能有幾百人打緊同一個電話號碼,畀啲耐性啦),有部分航空公司甚至有online chat,打唔通電話,可以試下呢個方法。

如果你真係有急事要出發,就可能要另買機票到其他鄰近目的地……

由於天氣並非航空公司可控制範圍,未必會有住宿及膳食安排,所以唔好貿然衝去機場,謹記留意最新出發時間啦!

02|留意旅遊保險條款

依家出國買旅遊保險係常識吧!不過記得留意番條款,延誤幾多個鐘先開始有得賠。

另外,要小心喺惡劣天氣出現之前就要買好,打緊風掛晒波先嚟買係唔會受到保障㗎!至於條界線喺邊呢,就留番畀你向保險公司查詢喇~

記得要問航空公司攞延誤證明,部分航空公司係自己上網索取嘅,記得問清楚喇!

03|又真係飛到喎

出發地同目的地嘅天氣都會影響航班延誤與否,但係天氣呢樣嘢真係會不似預期。若果起飛了,但目的地天氣突然轉壞,可能需要喺天上盤旋,直到天氣轉好再降落。

更甚嘅,可能係盤旋到冇油而被迫返航(真係返香港),或者要降落喺另外一個機場,例如去大阪,但降落喺名古屋,去濟州就降落喺首爾,返香港變咗去廣州、澳門等等。

由於能否再起飛返回原目的地涉及問題太多,包括天氣、機組人員休息(呢個係安全問題,唔係想唔想做嘅問題,即係你坐長途車都驚司機會瞓著一樣)、當地政府、航權、出入境、迫降地地勤支援問題,太多太多…… 的確試過迫降後,當地政府又唔准許落機被困機艙之類嘅事,若果你真係遇上了,敬請耐心等候安排。

都係嗰句,比起旅客,更想飛機冇事正常飛到又降落到嘅係工作人員……

04|我仲要駁機喎

呢樣嘢就真係要小心喇!若果你買嘅機票唔係聯程機票(即係一套過,例如一套機票出晒兩間航空公司經某地轉去目的地,e.g. 搭全日空經東京轉聯合航空去三藩市),而係兩張單程機票分開買的話,若果第一程延誤而令到你錯過下一程飛機的話,航空公司係唔會提供任何支援㗎!呢樣真係好重要好重要,若果你真係咁樣買咗,又預計到因首段航班延誤而錯過下一段機的話,記得及早致電訂位部安排喇!

05|充電線插頭跟身!

打風過後,機場亂到戰場一樣,又或者突然天氣轉壞,尤其是香港機場一分鐘有近 60 班飛機升降,一有延誤已經可以引起塞飛機情況。電話除咗解悶,要嚟check住航班訊息同打電話改機票更為重要,早人一步知道延誤、取消,打電話改機位係好重要嘅事(尤其旺季,所剩機位本身不多)。

祝各位順順利利,真。Delay no more!

以上內容乃工作經驗之集成,不同航空公司會視乎不同情況作出不同安排,詳情請詢問閣下所乘之航空公司。

下一頁:暑假旅遊旺季外出|航空公司超賣注意事項|地勤教路