暑假嚟喇,又係旅遊旺季。全個機場都忙到飛起,全個離境大堂都係人,喺呢度先提一下各位早啲到機場,預番時間排隊check-in同過關呀!今日同大家講下旺季經常會遇到嘅事,亦都係地勤櫃枱職員最怕嘅事!就係超賣,即係overbook 喇!

圖片來源:網上圖片、新傳媒資料室

航空公司超賣注意事項

甚麼是超賣?

簡單嚟講,就係賣出比原有座位數更多嘅機票。有旅客會臨時取消甚至訂咗位又唔到,即係俗稱嘅 no show,所以會有呢個咁嘅商業決定。

地勤職員亦冇辦法控制。但若果真係所有人都到齊咗,又冇乘客自願放棄機位,最後就會有人被拒絕登機了。

航空公司超賣情況非常常見

其實淡季都會有,旺季就更加唔使講了。依家有部分航空公司喺一年前就有極抵嘅搶機票活動,好多人都唔理有冇假,買咗先算,去唔到就由得佢,令到呢個情況更難預測。

對地勤嚟講超賣係壞事!

雖然對地勤人員嚟講就係壞事,因為要冒住被人鬧嘅情況下尋找自願放棄登機嘅乘客。不過某啲情況下,卻可能係好事。

因為航空公司都要幫因超賣而上唔到機嘅乘客「諗定後路」,例如可能你原本需要經東京轉飛美國,因為香港東京超賣,所以就需要搵乘客轉乘另外一啲航班去美國,可能會由轉機變成直飛,都唔係未試過 ( 當然了,要視乎航空公司安排同機位狀況而定啦,唔係必然 )。

被選中拒絕登機有冇賠償呢?

各個航空公司甚至同一公司不同航線都有唔同準則,所以不能一概而論。

一般來說會有現金賠償、餐券,或者一啲禮券,或貴賓室邀請,或交通費、或住宿(被迫多留一晚)。又或者升艙之類不同形式嘅補償。

5個避免成為被選中拒絕登機的乘客

01|避免旺季出發

02|盡早check-in

若果一直都冇人自願,最遲check-in嘅乘客非常非常大機會被拒絕登機。

03|網上check-in

航空公司都會避免選擇已經check-in咗嘅乘客,但你到櫃枱寄行李時,職員都可能會問一下你哋有冇興趣幫忙讓出座位。(仲有,旺季早啲上網劃位同啲friends一齊坐吖嘛!去到櫃枱先問已經太遲了。)

04|成為會員並升至較高等級

航空公司都會避免選擇飛行常客,始終係熟客仔吖嘛!

05|行動不便、一家大細、扶老攜幼

航空公司都會避免揀一大班人,通常都會選擇單身或兩個。情況係,最後全機到齊了,原來只欠一、兩個位,都容易處理。

我可以自薦成為拒絕登機人士嗎?

你唔想上飛機出trip,或者原來你想玩多日嗎?可詢問一下櫃枱職員,甚至有某些航空公司會貼出告示尋找自願放棄機位嘅乘客。在此先同你講一聲感謝!

其實尋找放棄機位嘅客人係地勤工作嘅一部分,甚至乎,職員比起每一個旅客更加唔希望有超賣嘅情況出現,因為輕輕鬆鬆送每一位旅客開開心心上機,然後準時收工,係我哋每一日返工嘅願望。

以上內容乃工作經驗之集成,不同航空公司會視乎不同情況作出不同安排,詳情請詢問閣下所乘之航空公司。

下一頁:機票訂錯名 | 地勤教路,避免上唔到機!