大家唔好以為搭飛機前，過晒security check，就代表每個人都好安全，冇危險人物、冇炸彈冇刀冇槍。因為飛機上，客人(甚至係crew)都分分鐘收藏住「三大生化武器」，只靠味道，就足以殺人於無聲無息。殺傷力小則令人作嘔作悶反胃，大則令到飛機都要迫降。
乘客放臭屁後果嚴重 飛機要急降！
今年農曆新年曾發生一單新聞，有家航空公司一架從杜拜飛往阿姆斯特丹的班機，因為有一名男乘客在機上不停放屁，更因此爆發乘客衝突，機長決定緊急迫降在維也納。
本來「放屁」冇罪，但唔知幾時開始，喺飛機上，「臭屁」就好似變咗一件禍國殃民嘅生化武器。
空少因一督屁 被降職……
好記得幾年前，公司發生咗一件驚天動地嘅事件。雖然呢件事嘅受害人係好可憐，但就聞者（客人）傷心，聽者（同事）爆笑。話說，呢位當事人係我哋飛機客艙嘅老大。(到依家都仲好記得佢籍貫孟加拉，連名我都仲記得！！)
你唔好以為做老大就乜都唔使做，只係指指點點叫我哋呢班細嘅去做。因為，喺油王國航空公司，老大都要落手落腳去服侍富貴艙班冚家富貴賓。
而喺做緊service嘅時候，阿老大就喺飛機走廊，八月十五對住一位客人，放咗一督明亮清脆嘅「響屁」。大家要明白，喺飛機咁嘈雜嘅環境下，都仍然放到一督聲音咁震撼、超越飛機雜音嘅「響屁」，是一件多麼不容易的事喔！
呢督「響屁」臭到去咩level我就唔清楚，我剩係知道，當時嗰位富貴艙客人，激動到指住老大，大喝咗一句：
「You！ Get off the plane ！」
老大嘅「臭屁」雖然未至於大到影響飛機急迫，但公司事後就將佢燉冬菇，由老大燉到去同我一樣，做散仔。事件雖然好坎坷，為咗一督屁被降職，但每個同事聽番件事，同情佢之餘，都忍唔到笑。
講個秘密你知，我其實都唔知喺飛機上放過幾多百次「臭屁」。但我每次放完都逃離現場，等大家捉唔到兇手。有次放完我嘅生化武器，咁啱有同事經過，同我講：
「前幾行啲客可能偷偷哋食榴槤，好臭，好似榴槤味。」
而我都冇勇氣承認，好心虛咁答：
「係呀係呀！我都聞得，真係冇品！」