去旅行,總括而言兩個字就係增磅。除咗你荷包減磅之外,你個人會增磅不少,回程時,行李箱都增磅不少。去旅行食肥咗,當你以為返到嚟香港就冇事,咁就大錯特錯。成個櫃都係手信,你根本忍唔到口,買返嚟唔通唔食咩?

但到底邊個國家最容易令人增磅呢?以下係我個人感覺!

01 | 台灣(咬緊牙關大便)

台灣好多街頭美食,夜市行唔夠半條街已經足夠令你飽到撐。豪大大雞扒、臭豆腐、蚵仔煎、蔥抓餅……台灣食物偏向易飽肚同油膩,仲要加麻辣火鍋,我次次去台灣嗰幾日,大便都要咬緊牙關。

02 | 韓國(泡菜清腸胃)

韓國好多嘢都大大份,部隊鍋、春村辣雞、安東燉雞、奶奶一隻雞……但幸好每餐都有任食泡菜,每晚返到酒店都可以「大解放」,空肚迎接新嘅一日。

03 | 日本(兇手係甜品)

日本餐廳多樣化,分量亦適中,本來唔會太過增磅。但日本最恐怖嘅地方就係佢哋嘅甜品,就算你食到幾飽,望住啲梳乎厘、pancake同埋抹茶雪糕……又會忍唔住入去食。另一大兇手就係日本嘅零食,唔單止好食,仲好多花款,連薯片都幾十種味,每次開一包零食就好似拆禮物咁開心,想唔肥都幾難。

04 | 泰國(食辣試煉場)

如果食唔到辣嘅朋友更加可以減肥,就算鍾意食辣嘅,泰國嘢食都唔算肥膩。行街行到口渴,周圍都買到椰青,亦有好多攤販賣新鮮水果。最緊要嘅係,泰國天氣長期咁熱,你行街一定會出身汗,實行行街當減肥!

總結:

至於亞洲以外嘅國家,無論係英、美定係歐洲,對我個人而言,選擇種類有啲少。以法國巴黎為例,當你每日周圍都係pizza或意粉、牛扒或漢堡,到最後幾日,我總係忍唔住會搵啲唐人餐廳食番清淡少少。反而返到香港,會食得多過去旅行……

下一頁:美食天堂窮人恩物,旺角熟食中心!

Tags :