迪士尼騙案｜過百港人投訴迪士尼員工呃錢　要求官方跟進　網民激辯唔抵幫

迪士尼社交平台遭洗版投訴　樂園：已報警處理

事緣近日香港迪士尼樂園社交平台突然出現洗版式留言，詢問Carmen Chan 是否迪士尼員工，指控該名自稱員工人士以極低價銷售香港迪士尼樂園產品，包括酒店住宿、餐飲、年票會藉等。

有網民指曾聽說極低價的價錢低至$2,000住一晚酒店包3餐，更可以$3,118購入2張成人及1張小童金卡，所以不少人「幾萬蚊咁買」。直至近日有逾30名網民在官方社交平台留言指「我而家畀佢扣起咗啲錢，聯絡唔到佢，請問可以幫忙聯絡嗎？」、「Carmen Chan日日喺你哋酒店出現，拎住咁多張房卡幫人check-in，但7月10日開始無法聯絡」，希望園方能幫忙跟進。

迪士尼樂園回應：已報案

其後迪士尼樂園亦作出回應，指該名人士並非員工，而香港迪士尼絕不容忍任何違法行為，已將此事件向警方報案，並會配合警方的調查。如懷疑受騙，請即聯絡警方。香港迪士尼強烈建議賓客應直接從樂園官方渠道或透過認可分銷商 (名單到官網查閱) 購買樂園產品，提防不可靠來源的賣家，免招不便及經濟損失。

網民不忿：自己貪小便宜想樂園埋單？

對於有苦主懷疑受騙事件，有網民則「睇唔過眼」，大鬧「喺到嘈迪士尼都唔會幫你班人埋單㗎啦，自己貪小便宜之後被人呃就話主題樂園不負責任，諗都諗到啦下平到咁，真係唔抵幫」、「永恆嘅騙局幾時都有人信，開頭就緊係畀你試過得啦，後尾消失係騙徒慣常行為」、「貪字得個貧啊」、「私人買賣畀人呃就賴落樂園身上，點講都講唔通啦，唔好話我黑心，但真係抵班人被人呃，經一事長一智啦」、「一、兩折都信，當畀咗智力稅」、「其實自己搵唔到人就自己報警啦，你搞迪士尼做咩？」、「咁上網買到假名牌袋，你係咪要去叫官方負責，換返個正牌畀你」。

然而，在某些專頁中仍見不少人自稱有迪士尼門票優惠提供給大家，有網民懷疑騙徒再度出動，指一名同名同姓的人留下自己可提供「購買年票95折，PM」的訊息，引起網民質疑是否與騙案同屬一人，不過該名人士則解釋只是湊巧同名同姓。及後有網民再問「點解你會有優惠」，她則指「有少少優惠可以減錢，你想正價買我都可以正價畀你」，亦有網民替事主澄清涉事者非此人。