玩《Pokémon GO》 除咗怕撞到人,仲怕電話冇電。唔想見到比卡超又玩到冇電捉唔到,梗係要mark實以下幾個小精靈出沒熱點同加油站,仲要有埋 免費Wi-Fi 同手機充電 服務,天時暑熱,嘆夠冷氣再盡情捉!

撰文: Jackie

01 | 尖沙咀海港城 Harbour City

整個尖沙咀都有好多小精靈出沒,用Pokévision一睇,真係多到數唔晒。而海港城最正嘅地方係有大量PokéStop可以攞精靈球,仲有免費Wi-Fi 及手機充電 服務,兼可以借行動電源(俗稱:尿袋),交低$300按金,借到夜晚9點。海旁仲有好多水系小精靈,附近又有道場,歡迎各位小精靈訓練員隨時挑戰及升level。

02 | 尖沙咀美麗華商場 Mira Mall

美麗華商場一樣有PokéStop,仲有免費Wi-Fi、手機充電及行動電源外借服務,行過對面嘅九龍公園仲有機會捉到大岩蛇。捉小精靈、收集精靈球、孵蛋話咁易。一於放咗工約埋朋友去美麗華商場shopping,順便捉小精靈啦!

03 | 沙田新城市廣場 New Town Plaza

沙田今日下晝有好多比卡超出沒,想捉比卡超就要密切留意喇!新城市廣場有提供手機充電服務,隔籬就有沙田大會堂及沙田圖書館,有政府Wi-Fi任用唔嬲。再行過少少就係沙田公園,沿路都有唔少小精靈,食飽飯可以邊散步邊捉小精靈,話唔定仲可以識到朋友仔。

04 | 銅鑼灣時代廣場 Times Square

銅鑼灣港鐵站附近都有好多PokéStop,而喺正A出口嘅時代廣場,低頭玩《Pokémon GO》 嘅人就更多,有玩家報料,曾於時代廣場捕捉到奇異種子。時代廣場有3香港提供嘅Wi-Fi,3用戶可以無限次使用,而非3用戶亦可享3節合共90分鐘嘅免費Wi-Fi。另外,時代廣場有手提電話充電器借用,$200按金借到當晚10點還,唔怕玩到冇電啦!

05 | 中環 IFC

只要近海旁,都會發現好多小精靈。鄰近海旁嘅IFC亦係唔錯嘅訓練員落腳點,因為IFC有手機充電服務 及 免費Wi-Fi提供,場內仲有PokéStop,行兩圈又轉一轉個PokéStop,精靈球要幾多有幾多。IFC仲可以畀你借埋行動電源,行去碼頭捕捉佢哋。

06 | 屯門市廣場 tmtplaza

屯門真係有好多好多好多小精靈出沒!輕鐵沿線滿布小精靈,包你捉到手軟。手機玩到冇電可以去屯門市廣場急救,屯門市廣場有行動充電器借用服務及手提電話充電服務,想要Wi-Fi可以用3香港提供嘅免費Wi-Fi,唔怕冇得玩。

信和集團仲公布會喺旗下六個商場,由7月27日起,一連3日不定時於場內PokéStop使用Lure Module(小精靈誘餌),務求吸引各種稀有小精靈現身。屯門市廣場係其中一個被選中的商場,頭20名捉到指定小精靈嘅訓練員,仲可以獲得指定商戶50元禮券。

07 | 奧海城 Olympian City/中港城 China Hong Kong City/尖沙咀中心 Tsim Sha Tsui Centre、帝國中心 Empire Centre

同樣是信和集團旗下商場,幾個商場於7月27-29日會不定時在場內PokéStop使用Lure Module,吸引小精靈,想捉到稀有小精靈可以去碰下運氣。奧海城設有Wi-Fi、手機充電服務及外借行動電源;中港城有提供自助充電裝置;尖沙咀中心、帝國中心有Wi-Fi及手機充電服務。