$2,800/帳篷4個人+兩日門票 設備齊全：冷氣、風扇、迷你冰箱等等
成個「星夜高峰Glamping」套餐售價係每個帳篷$2,800，每個帳篷最多可容納4個人，包埋兩日門票＋一餐晚餐及一餐早餐，另外仲安排咗唔同嘅特別活動，睇嚟都幾抵玩。部分收益將撥捐香港海洋公園保育基金，體驗Glamping之餘，仲可以支持保育活動。
講明係Glamping，就梗係有個靚靚營同基本傢俬，仲有冷氣、風扇、迷你冰箱、充電插頭（夜晚可以整個杯麵食），附近仲有淋浴設施，兩手空空就可以去舒舒服服地露營，非常方便。一行出帳篷就見到360度嘅海景，夜晚仲可以同朋友坐喺營地傾下偈，睇下星星，成個體驗都好特別。
遠離都市繁囂，交通又便利，真係幾適合一家大細、成班friend子或者情侶sweet sweet一齊去過番晚。
由朝玩到晚 行山＋餵海獅＋夜探南極奇觀
海洋公園仲特別設計咗一系列嘅活動，全屬免費性質，包括導賞員帶行南朗山，同埋參觀香港海洋生物救護及教育中心，近距離親親海獅，連夜晚都可以去探南極企鵝，仲有主持帶參加者分隊大玩挑戰遊戲，節目好豐富！第二朝，如果你起到身，專人仲會帶你去全公園最佳位置觀賞日出。
