文：Sammi / 圖：網上圖片
01 | 2016 年 – Disney Halloween Time 反轉迪士尼
今年 9 月 15 日至 10 月 31 日，一連 47 天俾大家投入迪士尼故事中的黑暗世界！化身成「萬聖之王」的米奇及「萬聖之后」米妮，會舉辦一個盛大派對，歡慶萬聖節。當然，一眾迪士尼惡人會一年一度咁出現係大家面前，佢地仲會同米奇、米妮聯手反轉樂園，所以夜晚記得睇「迪士尼惡人大出巡」。
點樣反轉迪士尼？
樂園的「展藝館」會變成「詭夢實驗室」，大家將會遇上經典迪士尼故事的惡人，展開一場疑幻似真的迷離旅程。幻想世界的「夢想花園」都會變成「迪士尼惡人花園」。今年「飛越太空山」都改造成「星戰極速穿梭」，以前「飛越太空山」係萬聖節期間都會有特別效果，唔知轉咗做「星戰極速穿梭」又會有咩效果呢？
今年 Gelatoni 加盟香港迪士尼，所以會有更多現 Duffy 同 Gelatoni 的產品，大家記得去望下喇！
02 | 2015 年 – 詭城玩失蹤
失蹤於「詭影迷離莊園 」、迷走於「詭迷灰熊山谷」、迷失於「森林河流之旅 ─咒石迷蹤」，主要都係請了一眾的演藝人員為大家表演劇場和與大家互動，而上年已經無咗鬼屋，唔知今年會唔會強勢歸來呢！
03 | 2014 年 – 迪士尼黑色世界
2014 年係第一年推出「迪士尼光影匯」，暫時取替咗「迪士尼惡人大出巡」。
而且有一個全新節目「亞馬遜驚魂」，請來藝人陳國邦喺原野劇場上扮演探險家 Jonas Brisbane，向大家講係亞馬遜森林的歷險之旅中發生嘅怪事。
04 | 2013年 – 好玩．唔好叫
2013年，香港迪士尼加入新玩法，係大家玩或者參與活動都唔可以叫！而且係 2013 年加入的活動都有延續到2014 年舉行，包括黑色嘉年華「異」演及大頭寶寶。黑色嘉年華「異」演包括「火焰神」、「冰女王」、「蝙蝠紳士」、「黑鳥夫人」、「瘋骨妖姬」和「森武士」逐一表演過後，可以同大家合照，大家又有無同佢地影過相？
仲有反斗奇兵大本營的「大頭寶寶」現身俾大家影相打卡！2016 年 都會出現架！
05 | 2012年- 殭屍戰狼人
2012年，香港迪士尼樂園請到 Angelababy 代言，大玩殭屍同狼人，仲會問賓客加入殭屍隊定狼人隊！
仲有「詭墳學院」全新登場，依間鬼屋到 2014 年都仲可以玩到，可惜 2015 年已經無咗，唔通詭墳學院真係咁恐怖？當時開辦史上最驚人的全新課程，重點培訓未來的魔界鉅子，你又有無入學呢？
06 | 2011年 – 「頭」入 迪士尼黑色世界
以「斷頭騎士」為主題，傳說中的「斷頭騎士」首次現身香港迪士尼樂園，騎著馬穿梭「舊美國人間鬼鎮」尋回他失去的頭顱！小心你個頭呀比佢拎咗呀！
全新登場的「黑色馬戲班」的鬼屋，班主訛稱持有「斷頭騎士」的頭顱，惹禍上身成為復仇目標，引發怪事連篇！當然仲有 2007 年推出的大街詭異酒店。探險世界亦被東南亞各國鬼怪霸佔，化身鬼影幢幢的「咒怨黑森林」；明日世界亦會大開「明日世界怪誕夜」狂歡派對，為賓客準備好一連串精彩的街頭表演！
07 | 2010 年 – 黑魔后做主角
睡公主入面的奸角—— 黑魔后，除咗係早前《黑魔女：沉睡魔咒》擔正做主角之外，其實係 2010 年 ，佢已經係迪士尼黑色世界嘅主角。黑魔后都幾勁，可以打敗咁多位的奸角，大家 2010 年又有無去玩呢？
黑巫婆為展示她的魔力，將會以怒火把煙火化為魔咒，上演全新的「魔咒焚城」煙火表演。入夜後，滿天瀰漫煙火魅影，在淒厲笑聲及強勁音樂襯托下，睡公主城堡將被荊棘、鬼魅、蜘蛛和火焰吞噬，在上空發放從未見過的魅影煙火，將「迪士尼黑色世界」的氣氛推向高峰！
08 | 2009 年 – 宇宙深寒
2008 年以外星人為主，講有股黑暗力量變本加厲，神秘能量甚至擴散至宇宙的深處．吸引一群深不可測的外星異類(其實好唔迪士尼呀！)。當時大家有無俾一班外星人威脅，發生咗啲不能解釋嘅異象及離奇的怪事呢？
09| 2008 年 – 森魔詭域
「入去容易，出去…」，2008 年嘅主題就係「森魔詭域」，係當時新加入的鬼屋！探險世界是森林魔怪重點出沒的地點！其中最驚險刺激的，莫過於集盜墓、尋寶和逃生元素於一身的「森魔詭域」。這是擁有全新故事背景及劇場佈置，獨一無二為香港迪士尼樂園而特別設計的娛樂體驗。
10 | 2007年 – 大街詭異酒店 陳奕迅代言
香港迪士尼樂園開幕兩年後，第一次舉辦「黑色世界」來慶祝萬聖節。原來係由陳奕迅做代言人。
當時香港迪士尼可能想試下反應，所以得一間鬼屋，就係大街詭異酒店。準備工作都做得好足，預告片係有完整版的故事設定，令到大家可以玩得更投入。同時仲推出夜光鬼魅巡遊，講到「黑色世界」的代表，米奇都會表示，主角不是我。因為係由「怪誕城之夜」主角阿積負責！係巡遊入面，阿積仲係做領航角色，而且係香港迪士尼樂園第一次喺夜晚舉行巡遊。
萬聖節期間，「飛越太空山」變成了「驚心動魄太空山」，為極速過山車體驗加入更多毛骨悚然的 3D 立體影像效果及似有還無的詭異音樂，每個急彎皆鬼影處處，眼前景象令人不寒而慄！