撰文：Fitz.hk｜編輯：Yuen｜資料及圖片來源：Fitz.hk
香港另類奇景01 | 最得意：芝麻灣 肥豬石
肥豬石位於芝麻灣半島，下徑碼頭側邊。有人話，石頭似足有隻大肥豬企在海上面，又怕被浪整濕身，所以雙腳縮起來。
路線：
- 長洲搭街渡至下徑，臨登岸前，可近距離欣賞肥豬石。
- 沿芝麻灣郊遊徑，中途有路落下徑。
香港另類奇景02 | 最驚險：西貢 雷打石
雷打石，可以係一座山，高379米，亦可以係一嚿石，位於雷打石山頂附近。呢座山喺西貢麥理浩徑第三段側，一般上麥徑操山嘅朋友，都係過門不入，只係喺山下經過。其實，如果唔係時間緊迫，不妨上頂睇下。因為可欣賞郊野景色，亦不失為操練時一個好嘅調劑方法。
路線：大致而言，去雷打石除咗可以沿麥徑三段出發，過咗樟上、畫眉山，到M060標距柱左右，右手邊上山就係雷打石。嫌麥徑悶，亦可以由北潭涌，經太墩上雷打石。
香港另類奇景03 | 最神秘：草山 交叉石
聳立喺黃竹洋對上嘅草山山脊，電塔側邊一嚿有個大交叉嘅石頭，唔知由幾時開始，去開草山嘅山友，都要專誠行兩步過去打卡。
路線：最直接嘅路線由城門水塘主壩，經針山山腳沿林道上草山。到麥徑標距柱M134左近，有小路可到達電塔側之交叉石。沿小路可落火炭。
香港另類奇景04 | 最偏遠：黃竹角咀 鬼手岩
鬼手岩係香港地質公園嘅地標，好多人都喺相入面睇過呢嚿「奇石」。不過，由於路途遙遠，位置偏僻，所以唔少山友只係隔住個mon睇下相。
最短嘅路線，就係由西貢黃石碼頭，租「大飛」或「細飛」(即快艇，大嘅可載約20人，細嘅載6至7人)，坐船30分鐘直達黃竹角咀，然後依以下路線到烏蛟騰搭小巴走人。
-
- 路線：黃石碼頭 (船) > 黃竹角咀 > 大嶺 > 跌死狗 > 鹿湖峒 > 上下苗田 > 烏蛟騰
- 距離：12公里 (黃竹角咀至烏蛟騰)
- 需時：10小時
- 難度：4.5星 (5星最難)
香港另類奇景05 | 最浪漫：城門水塘 白千層
圍繞住城門水塘，其實種滿白千層樹。而每當雨季，水位上升，就會掩蓋呢啲樹。位置大概係城門水塘正北方嘅沙洲。呢啲樹，其實原產自澳洲，係生長於沼澤地方，所以就算佢哋畀水淹浸，都唔使驚佢哋會浸死！
路線：可由城門水塘小巴總站，經旅客中心沿菠蘿壩自然教育徑，再走林道，步行約30分鐘到達。
香港另類奇景06 | 最壯麗：萬宜 破邊洲
破邊洲嘅位置，係喺香港地質公園範圍，呢一帶嘅地質，係形成於大概1億年前嘅侏羅紀時期，當時有多次火山爆發，熔岩同火山灰嘅積聚，造成咗六角石柱嘅地質。
要欣賞破邊洲，有以下方法：
- 企定定喺萬宜東壩離遠睇，感受大自然嘅鬼斧神工。
- 綑邊攀爬花山，甚至登上破邊洲！好處係可以近睇，仲可以睇埋沿岸嘅海蝕洞。問題係呢條路線相當危險，要有經驗人士帶領，仲要視乎海浪情況，太大浪唔好行。
詳細路線見《[真．破邊洲] 行程全攻略》。 - 由萬宜東壩入口之紀念碑，沿山徑過花山頂，到達花山之峭壁，再近睇破邊洲，仍可感受箇中震撼(步行約1小時)。
香港另類奇景07 | 最離奇：大澳 將軍石
大澳將軍石係大澳地標，高10米，面對著伶仃洋。離遠睇，石頭就似一位將軍倚住山崖休息。
路線：要睇將軍石，最簡單就係坐渡輪往返大澳 (屯門或東涌)，喺大澳石埗仔碼頭沿海而行，約15分鐘就可望到。能力夠嘅話，仲可以穿過石灘爬上去！
原文刊於 Fitz.hk 網頁，facebook：Fitz.hk
免責聲明：本專頁刊載的所有移民資訊，只可作參考用途。讀者在作出決定前理應審慎，若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。