職員見導盲犬即抗拒：唔得喎！
有網民向Facebook專頁「生仔要考牌系列」投稿，他表示有日在茶樓飲早茶時，坐在近茶樓門口位置。當時有一位視障人士帶著一隻身穿「導盲犬」字樣衣服的狗進入茶樓，茶樓職員見狀隨即詢問：「有冇帶車或者狗袋？」視障人士回答到：「冇。因為佢係導盲犬嚟，受過訓練唔會咬人，唔會騷擾人。」但職員十分堅持：「唔得喎，我哋呢度一係入狗袋，一係用狗車。」
10歲小朋友大聲指正
正當事主想上前斥責茶樓職員時，一旁一位年約10 – 11歲的小朋友大聲指正：「導盲犬可以入餐廳㗎，唔使用寵物車」。茶樓職員面對突如其來的駁斥十分尷尬，並猶豫地指需要詢問經理。及後經理出面處理事件，但語帶不善地說：「你快啲入嚟，快少少食，一陣食環嚟查，我哋就大鑊。」
其後視障人士與導盲犬雖然可以進入茶樓用膳，但就被安排到非常靠後的座位，而且更要面對茶樓其他食客的冷言冷語。事主憶述到：「啲阿婆阿伯嘅眼神就係好嫌棄，雖然人哋因視障睇唔到啲嘴臉，但你哋話『驚會食到啲狗毛』，人哋都有耳係聽到㗎！」
當視障人士經過剛才見義勇為的小朋友一家時，小朋友鼓起勇氣向視障人士說到：「唔使理佢哋，隻狗狗好可愛。」小朋友媽媽見年幼的兒子如此懂事亦深感安慰，摸了兒子的臉，並讚他「叻仔」。事主感慨到，媽媽的鼓勵對於小朋友而言非常重要：「因為俾個小朋友知道，就算大部份人覺得係錯嘅事，其實你先係啱㗎！」更指一家人十分有愛，亦相當佩服小朋友的勇氣。
網民大讚：小朋友好波！
投稿公開後，大批網民都大讚小朋友與媽媽：「小朋友真係好叻，大人都未出聲，但小朋友就立刻出聲，勇敢！」、「佢媽媽個牌係金色嘅」、「不論年齡身份同地位，正知正見正言好重要」、「同理心同正義感唔係人人都有！」
亦有部分網民批評茶樓的歧視行為，更呼籲「開名」：「呢個茶樓應該開名啦，咁有常識，搵平機會教下佢哋嘛」、「應該要投訴，告佢歧視」、「咩叫做食快少少呀？我而家做賊呀我有畀錢喎」、「其實政府都宣傳咗好多年㗎啦，點解仲有食肆咁無知」、「已經2022年喇，仲有咁嘅職員」。
拒絕導盲犬入餐廳屬觸法行為
根據食物環境衛生署資料，《殘疾歧視條例》（第487章）訂明，任何人士如拒絕視障人士攜同導盲犬進入容許公眾人士進入的處所，或拒絕向他提供服務或設施，則可能被視為觸犯《殘疾歧視條例》。《食物業規例》（第132X章）第10B條在規定任何人不得攜帶狗隻進入食物業處所的同時，明確訂明為完全或局部失明人士充當嚮導的狗隻則屬例外，故現時法例是容許導盲犬進入食肆範圍內（食物室除外）。
