有冇朋友仔農曆新年假會去首爾?韓國人習慣穿上韓服回鄉喜迎親友,市面上好多舖頭都會關門,所以呢段時間去首爾,shopping掃貨真係有啲困難,倒不如入鄉隨俗,穿韓服去觀光啦!今次綜合過往中伏經驗,同大家講講租借韓服的6個重點!

text: A君的泡菜日誌 | photo: 新傳媒資料庫

01 | 想揀心水款?記得早30分鐘到場!

韓服設計華麗,款式真係超級多,不過真係有好多遊客去租借,試過星期二去依然全場爆滿,勁誇張!記得當日為了租借港女最愛的粉紅色款,全世界早15分鐘到達韓服店,點知竟然開咗門,舖內仲要勁多人,人潮誇張過名牌店1折開倉!

快快手衝入去搵粉紅色款,可惜已經全部租出,任務失敗!問過店員,原來好多客人都早30分鐘到店外排隊,為的就是搶頭位揀選心水款,尤其粉紅色真係最搶手,所以各位男朋友唔想身邊嗰位扁晒嘴,記得要早啲去排隊!

02 | 完全唔識穿著?叫韓妹幫手!

舖入面只有 3 個更衣室,如果唔想等更衣室,打定底可以直接換就最方便!不過講真,韓服設計勁闊又多層次,所以第一次著真係完全搞唔掂!場中見到好多遊客都好怕醜,唔敢出聲問人,而店員又超忙,最後只能馬虎穿著!

其實綁腰帶、紮胸口蝴蝶結等都非常考工夫,試過出聲問韓妹客人想叫佢哋幫幫手,佢哋知我哋係遊客竟然立即應承,仲幫手set頭,簡直係救星!

韓服服結有特定綁法,綁錯的話會被韓國人眼望望,最好由店員代勞。

03 | 冬天著韓服,記得要保暖!

1、2月出發首爾,氣溫多數接近零度,韓服布料勁薄,當然唔夠保暖吧!咁究竟要點穿著呢?韓服裙襬超級闊,完全睇唔到你在裙襬內穿了甚麼,所以盡情著吧!建議著leggings+絲襪要多加一條牛仔褲,咁就唔怕裙襬入風會好凍,一定夠暖!

04 | 咪貪靚著高踭!波鞋先夠舒服!

剛剛講過韓服裙襬又長又闊,令不少女士為了令雙腳更顯長,會貪靚著高踭。但事後通常都會勁抱怨:「真係超級辛苦!」因為搵靚景點行路行勁耐,又要行沙地、泥路等,真係好麻煩,而且綁鞋帶要遞高隻腳,絕對係攞苦嚟辛!

所以大家咪挑戰,著波鞋一定最穩陣,想雙腳更顯長?揀厚底platform款吧!

05 | 入化妝店購物順便補補妝!

著住韓服周圍行街影相,個妝真係好容易溶!為咗唔好辛苦公主大人,我提議去化妝品店試妝仲方便!行多兩步真係有間舖,當然要試試成唔成功啦!

一入到店,韓仔化妝師立即上前招呼,睇完妝物後,多口問佢著韓服行化妝品店係咪好怪?韓仔話原來好普遍,仲即刻幫手化個新妝,話粉橙色胭脂同唇膏先襯粉藍色韓服。

06 | 著韓服行街好尷尬?完全冇問題!

著韓服行街以為會有好多人投以奇怪目光,結果係完全冇人理!其實韓國人非常習慣旅客著韓服周圍去,所以唔好再驚尷尬,就算去景福宮、北村等景點,甚至著住去弘大行街都唔怕!

好多oppa都話好少見女仔會著住韓服行弘大,不過佢哋都覺得女仔著韓服時特別吸引,甚至會有oppa 上前抄牌!所以奉勸各位男朋友,唔想honey 被韓仔評頭品足,就真係「千祈唔好帶女朋友去首爾著韓服」喇!

著韓服行街太怕醜?實情是當地人完全唔會理你。但如果掃街就要小心喇!原來好少人會著住韓服企街邊食嘢,因為怕整污糟件衫要賠錢!

相關閱讀:盤點 8 大首爾汗蒸幕 | 血拼後治癒疲勞!

最新的韓國入境要求詳情?

韓國宣布即日起至2月底,所有來自香港及澳門航班必須使用仁川國際機場降落, 即睇:韓國入境最新要求限制。在入境韓國前,建議也可買定韓國電話卡,部分更有通話功能,以及選定心儀酒店

韓國首爾有什麼好玩推薦?

首爾美食多籮籮,即睇美食推介,而醬油蟹絕對是其中一樣必食美食;一人旅遊到首爾不知到哪覓食?大可到訪首爾可以一個人用餐的人氣獨食餐廳。玩樂方面,滑雪是不可錯過的活動,5大滑雪場適合新手一日遊,亦可到樂天世界大玩遊樂設施及韓服體驗。另外,也可用幾日時間到釜山玩返轉,即睇首爾去釜山交通懶人包。準備到首爾賞櫻花的大家,可預先一看首爾櫻花預測及賞櫻地點推介