出生於八十年代嘅孩子，唔學似而家嘅小朋友咁，幾歲就可以拎住部iPhone返學，記得我的第一部手提電話都係中二時先有，係Nokia 3310。個陣時手機就只係一個打返屋企嘅工具，最多就係上堂偷偷地係枱底玩貪食蛇，同埋用同台SMS同同學交流，識用一定係用爛橙Orange！
。
。
我個年代嘅手機，邊似得而家一年換一部，記得我用左3310幾年之後，先至捨得換一部而經出咗成年幾嘅Nokia 8250，而呢部亦都係第一部陪我出國嘅手機。
。
當時嘅旅行好簡單，食就食、玩就玩、瞓就瞓。雖然8250比起3310已經進步左唔少，同埋仍然係硬淨過塊地，不過除此之外，就冇任何特別之處，尤其係出左國之外，佢嘅最大功用都已經冇埋。
。
亦都因為係咁，以前嘅旅行我無需要買Sim卡，亦唔需要到處搵wifi，手機一直放係gip入面完全係冇問題嘅。我哋出門最重要反而係拎部DC，影底周圍嘅風景，而其餘時候都係同朋友吹下水，享受一下大家一齊旅行嘅時間。
。
相反今時今日嘅旅行，好多人可能對住手機whatsapp、upload相上ig, facebook、覆老細email等等嘅時間係多過同朋友傾計，而且一冇左wifi，就好似周身唔自在咁。無錯！不知不覺間我哋已經變晒手機奴！
。
試下問下自己或者身邊嘅朋友，下次旅行嘅時候，唔帶iPhone唔帶Android，淨係帶返屋企櫃筒個部封晒塵嘅Nokia，有冇人敢挑戰？