唔知各位仲記唔記得台灣觀光局嘅機票「飛三送一」優惠呢?上年推出後,quota極速爆滿,睇黎香港人都好喜歡去台灣,當台灣係第二故鄉呢~ (黃安唔好檢舉小編呀! #曲線要講明)

而有消息就指出,呢個「飛三送一」優惠今年又返黎喇~

轉載自蘋果日報「費清」的專欄,台灣觀光局香港辦事處巫宗霖主任話,因為去年全年港人赴台灣數字錄得破記錄逾151萬人次,為咗答謝港人,今年繼續有「赴台3次送1張來回台灣機票」優惠。

2016年度的優惠內容大致係,由1月到8月31日期間,去台灣玩嘅香港人只要保留3次來回台灣、合共6張登機證正本,連同有台灣移民署印章的出入境入台證正本,並喺今年9月30日前,郵寄或親臨台灣觀光局尖沙嘴辦事處,就可以換到來回台灣經濟客位機票一張。今年嘅詳情未出,但相信同上年大同小異,參考住上年嘅玩法先啦!

今次quota比舊年多,總共有4000張,一人以先到先得形式限換兩次。各位要換的話要好好留意時間,「睇住呀!手快有手慢無呀!」

巫主任又話,今次住宿都免費送;觀光局針對「對社會服務有功」人士提供優惠,只要入住參與優惠計劃嘅酒店民宿,憑「第二晚免費住宿券」,免費住第二晚!合資格人士包括醫生、護士、紀律部隊、記者、老師、義工等,咦咪即係小編都有份?

除住宿同機票優惠外,仲有一個「首次遊台簽證獎賞」。非港澳出生嘅香港永久居民首次遊台簽證,赴台後回港,可以憑簽證費收據正本、登機證、入台證,領取簽證補助費150蚊。優惠期再長少少,到11月30日。

睇完一次,小編只能大聲慨嘆,點解要比咁大個優惠引我去台灣大出血/瘋狂增肥~ 唔講住,些牙比朋友先,你都快d話比你身邊的「哈台」朋友知喇~

————

臺灣觀光局香港辦事處

Facebook:It’s Time for Taiwan – Hong Kong and Macau

辦公室地址:香港九龍尖沙咀廣東道30號新港中心第二座10樓1010室(尖沙咀站A1出口)

辦公時間:星期一至星期五9:00 – 17:00

詢問電郵:[email protected]

詢問電話:2581-0933

延伸閱讀:

「臺鐵e訂通」完整教學

悠遊卡百科全書(上)

悠遊卡百科全書(下)