前兩日港女又去了一轉澳門，親身上 巴黎人鐵塔直擊 。不過返香港忙著捉小精靈，今日終於提起勁寫一篇感想。事關這兩日身邊的朋友仔都問，究竟鐵塔A貨味濃不濃？個景美不美？值不值得上去一次呢？等我一次過跟大家解答啦！
Q1）跟法國巴黎鐵塔有幾似？
A）港女出發前都想藐爆山寨貨，不過現場去到有改觀。因為外形上模仿到十足，就下角度影相，話身在法國都有人信。不過塔身比正版小一半，塔下的蚊形花園，絕對沒有戰神廣場大，感覺很難找到靚位跟鐵塔影合照。
去片：
Q2）會不會土豪風娘味濃？
A）酒店外觀不會閃到爆，幾靚。雖然未完全建好，不過港女現場所見，都不會很「娘」，塔內暫時亦未見到簡體字，都可以幻想自己去了法國影相。不過開幕之後，相信迫爆強國團，我隨時要收番以上這番說話。
Q3）跟正版一樣有鐵塔鎖匙扣賣？
A）現場未見紀念品店，如果有，港女都絕對不會買，收朋友老土手信仲未夠咩！
Q4）鐵塔有幾多層會開放畀公眾？
A）兩部鐵塔電梯可以去到7樓觀景台、17樓樓梯中轉平台（未知會否開放予公眾）和37樓頂層觀景台，住客和非住客都要付費入場（價錢未公布）。不過暫時見市面上的酒店開業優惠套票，一晚住宿已經包埋7樓觀景台。遊客另可由主樓天橋行到鐵塔6樓。
Q5）塔內有餐廳？
A）有，不過個人不太期待。由酒店主樓有天橋行到鐵塔六樓的「巴黎軒」，完美迎合國內豪客，食中菜堅破壞氣氛，你食埋我嗰份！雖然今次未親身入餐廳睇場，不過位置不高，個景好極有限。
Q6）上到頂層可以睇到甚麼景？
A）鐵塔位於路氹大道中間，面向金沙城和旁邊的爛地地盤，背面是酒店主樓，可以遠眺澳門市景。不過想睇日落會失望，幾乎完全被酒店主樓遮擋，勉強可以欣賞到天上紅霞。另外左右則是威尼斯人和新濠影滙。
Q7）觀景台值得入場嗎？
A）雖然兩層觀景台都未公布收費（預計頂層的會更貴），不過預計會跟隔籬的8字摩天輪差不多，大概$100-200左右。不過講真，頂層觀景台不大，唔影相齋行一分鐘都行完，值不值就見仁見智喇！港女認為去7樓的就夠（因為套票已包）！
Q8）開幕之後會不會想住？
A）根據酒店公布資料，酒店內有水世界（目測不大）、劇院、購物中心和餐廳等設施。個人的興趣不太大，不過勝在價錢抵，平日去連船飛不用九百，新屎坑值得住一次試下。
