之前講開,要去一個地方又有幾難呢? 一張機票係去旅行嘅第一步。

而第二步就係要搵住喇!
旅行搵住嘅,我都會有3大原則:
1. 位置: 近主要嘅交通接駁或景點
(因為自己係路痴XD,最好搵d近車站同易搵嘅,咁又可以慳搵同搭車嘅時間,所以呢個Point 係最重要架!)

2. 環境: 衛生同設施
(雖然去旅行大部份時間都在外,但如果訓得唔好,又點可以補充體力,繼續玩呢! 所以旅行住嘅環境都好重要,有其他娛樂設施仲可以係訓唔著時解下悶添! 我記得有一次揀左間比較舊嘅,d 燈都比較黃,d 牆又裂,訓嘅時候都幾驚,因為個人覺得舊就有種陰深嘅感覺。>.<) 3. 價錢: 合理 (通常我都會根據原則1 &2 選擇完後,再係剩餘嘅入面選價錢最低嘅。)

哈! 今次係巴黎嘅住唔洗自己搵,咁就倒番轉分析同分享下啦!
(呢個景真係好正呀>V<)

巴黎Hostel — St Christopher’s Inn, Gare du Nord, Paris

1. 位置: Gare Du Nord (北站)

位置非常方便,距離Gare Du Nord站 大約步行5分鐘內,Gare Du Nord經火車RER B、D同地鐵4、5 線,近機場快線,亦近市中心交通接駁。

(網上相片)

2. 環境:
2013年落成,房間同設施都好新,而且房屋選擇類型好多,有單人、雙人房、4,6,8,10 人混合型,適合唔同需求嘅客人。

我地住嘅係單人房double bed,而且床頭有得充電同有小型電燈,方便半夜起身都唔知係邊到模電製呢! 2日有人清潔1次,都幾乾淨架。

每層都有唔同嘅主題,唔知係咪配合番法國嘅藝術味道呢? 而其他房間又係點呢?

呢個係雙人房單人床,同單人房差唔多。

去到Dorm ,私隱度都幾高,每張床都有窗廉,又有獨立嘅燈。
(網上相片)

D 行李仲可以好好咁鎖好,咁就安心喇!

如果大型行李喼唔想就咁放係房,可以拎去地庫嘅locker 鎖起佢,但就要比錢喇!

而地庫嘅另一邊仲有好大嘅party 場地,可以搞live band show添,氣氛一定好正!

頂樓有洗衣間

望落去就見到restaurant & bar,玻璃頂部設計可以見到咩天氣,想當日我地都係咁睇雨停未,之後再出發呢!

呢度有免費早餐、有免費WiFi,係搭LIFT 位對出,有個自助旅遊資料Corner,冇特定行程嘅,可以拎番幾份睇下度下!

Reception 對開仲有個Common room 添!

整體黎講呢間Hostel 嘅環境都唔錯,service都幾完善,都幾滿意^^

3. 價錢:
可以去下面條LINK揀番自己心水房間,Check 番合唔合理啦!XD
http://www.st-christophers.co.uk/paris-hostels

會去巴黎嘅朋友,未有心水選擇,都可以考慮下呢間架!