話說，三藩市景點唔多，來來去去都係嗰啲。有一日去漁人碼頭見到呢個牌，寫住有釣魚團，就上網search下。一睇，全部都係釣到勁大條魚又有鯊魚，以為係專釣大魚嘅釣魚團！(講到呢到已經知道我釣唔到大魚，不過都玩得好開心，請繼續閱讀)
船家唔係每日出海，所以需要預早打電話查詢預約。要注意，報名後，船家會提醒你先上網申請釣魚牌照，要有牌照才能出海釣魚。
當天，0530am 咁早便上船集合，不過帶住以為會釣到大魚既心情係好興奮，一啲都唔眼訓！
開始離開三藩市，能夠睇到超靚日出 + 超難得角度睇金門橋，我覺得呢一刻係其中一個值回票價嘅地方！現場咁睇真係超級壯觀，尤其係我呢啲咁鍾意睇日出日落嘅人！
大概0830am，終於可以開始釣魚！基本上出到太平洋，大概放魚桿15分鐘就有魚上釣，不過當然同我地想像有好大落差，只係釣到正常size嘅魚，不過品種特別。而且支桿好大力，唔使同條魚鬥力已經可以釣到魚上嚟。
呢個時候上左船四個小時，我已經處於半死狀態，釣到一條魚就入去休息15分鐘。同行既朋友因為住香港離島區，由細到大每日搭船出入，但佢都差啲頂唔順，可想而知太平洋海浪真係好大，唔係我弱雞。
除咗釣魚，個人十分享受近距離見下呢啲野生動物，例如係呢種食魚既鳥類(唔知咩名)，又可以餵海鷗，以為自己拍緊discovery channel。係茫茫大海當中，望住佢地浮下浮下，等我地餵嘢食俾佢，覺得佢地有啲無助。面對住人類，動物的確係幾無助，希望人類愛惜自然環境和地球！
大概釣魚到2pm就回程啦，回程到漁人碼頭。點知原來有隻野已經等左船長好耐，就係呢條海獅啦！原來呢隻海獅每日中午時份，就會嚟到呢度等船長出完海返嚟，餵佢食魚！本來已經完結嘅旅程，因為呢隻海獅增添左好多樂趣！
係我人生第一次咁近距離接觸野生動物，咁近距離餵海獅！隻海獅超級大隻，好活躍好得意！
經過咁近距離接觸，我先感受到海獅係超級有靈性，除咗會等船長，佢仲會吹水波同發嬲！因為我頑皮嘅朋友餵佢嘅時候，將隻手貼到好近水面，海獅就發嬲噴氣，表達「唔好當我流既！」的心態。
最後，船長會切好魚獲，分配好，我哋亦都可以攞返去煮。但可惜我地住酒店無廚房，又唔想比好貴價錢餐廳煮，所以我地無要到。呢樣係極度可惜，因為太平洋釣返嚟嘅魚全部都係野生斑類，係香港買每條都要百幾蚊。所以如果每人拎返5-7條，都值回票價，而且一定好新鮮好美味！
P.s. 同行釣魚伯伯知道我地無廚房，誠意邀請我地去佢屋企作客一齊食魚，可惜我地釣完魚要趕飛機(到最後飛機仲要cancel埋)，超級遺憾！
P.p.s. 船長除咗餵魚比海獅食，亦會將多餘既魚送俾一個看似無家可歸的婦女(美國好多homeless)，每天都會。船長話佢睇住自己長大，所以俾佢都無所謂，好好人！
最後，總括旅程，雖然有點貴，暈船浪爆辛苦，又釣唔到大魚，但過程所見所聞真係好特別，係會畢生難忘的經驗！
P.p.p.s. 希望自己和大家都能更愛惜地球，保護自然環境及動物。
地點: pier 39 漁人碼頭出發，不同碼頭也有釣魚行程，可上網搜尋
時間: 0530am – 4pm
價錢: 175美金/位
釣魚牌照: 要申請該州份的牌照 及 繳付牌照費用，可上網搜尋
https://www.ca.wildlifelicense.com/InternetSales/
提醒: 真係要食定暈浪丸