以為美國玩槍好安全，諗住第一次玩一定有導師在旁教導，點知，佢簡單幾句講解如何上子彈，點開槍，就俾我地入去啦。唔好講笑，入到去真心驚！雖然一定要戴住耳罩、眼鏡入去，但每一下槍聲都好震撼，好似打入我個心咁大聲。
玩槍既前幾日，睇到一個關於打仗既展覽，展覽入面講原來除左戰爭造成既傷亡，每日都有好多軍人自殺。當時我唔明白點解，但當我入到練槍房，拎起支真槍，我就明白。周圍環境槍聲不斷，只要有咩意外我就好可能中槍死，或者我只要對準一個人開槍，就可以殺人既感覺真係好恐怖。而且我地幾個都係第一次接觸槍，就可以係槍房自己開槍玩，我心諗佢唔怕我地唔小心射到人既咩？
你睇到呢到，一定質疑我係咪真係咁驚？其實我真係勁淆底，第一次去個陣，我俾左錢都唔夠膽開槍。係同行既男仔玩過第一次覺得好好玩，第二日再去，我先鼓起勇氣自己開一槍。因為我諗，萬一第時真係有咩意外，如果我係生死關頭，人地俾支槍我我都唔識開就死梗。所以就勇敢試咗開人生既第一槍。
呯！原來。。。開槍係可怕得黎，又莫名地幾爽嫁喎！唔怪得我啲朋友玩完想再玩！而且唔怪得有咁多變態殺人狂，可能佢地係覺得開槍殺人好爽！
講返整個開槍體驗過程，遊客首先要交passport 先可以玩，當地人就交身分證，然後要填一份表，類似生死狀、免責聲名。跟住就可以揀槍靶， 揀槍，或者你自己有槍都可以用自己既槍同子彈。我試既係美國警察手槍，已經係全店最細火力。而我朋友就揀支左輪Ruger Redhawk，每開一槍都有火光，真係嚇死我！
收費 : 子彈 USD＄30/袋
租借槍械 USD＄6/把
人頭費 USD＄24
地址 : 684 N Berry St, Ste C
店舖 : Orange County Indoor Shooting Range (美國不同地方都有練槍店，有戶外亦有戶內)