一講到去東京旅行，大概就會想到shopping、食嘢，同shopping。 想去遠離塵囂一點嘅地方？今次深導遊就帶大家去一個好多日本人一家大細或拍拖會到嘅輕鬆假日勝地—葛西臨海公園。


我哋由東京銀座出發，坐JR大約半小時就到，好方便快捷。一出葛西臨海公園JR站，就已經有大大個牌寫住「葛西臨海水族館」。離遠一望已經好想入場睇呢個水族館，因為佢建築好靚，透明淺藍玻璃配合藍天白雲，未入場已經要影好多相！

入場費算便宜，大眾700円，65歲或以上350円，中學生(13-15歲)250円，算好抵！

一入場，就有大魚缸迎接你。場內氣氛好好，微微音樂，暗暗燈光，一個魚缸都可以慢慢欣賞好長時間。

不過場內仲有好多其他魚等緊你，例如呢條翻車魚。呢條魚奇形怪狀好得意，細心留意佢一陣，佢竟然將自己個鼻撞向魚缸玻璃，好搞笑！

一路行入去，仲有好多大大細細嘅魚缸，連千年深海魚都有。

有時，魚缸入面嘅魚睇落好自在好無憂，懶文青的我想：「到底是魚被困，還是我們被困？」 

睇睇下魚，有時會見到工作人員在魚缸內清潔玻璃，見到有小朋友停低望仲會表演吹波，同小朋友合照。

終於講到重點推介，就係touch and feel摸魚體驗喇！
呢個水族館除了睇魚，仲有摸小鯊魚同小魔鬼魚體驗。活動有在限定時間內先開放，所以安排行程時要注意！首先，摸魚前要洗手先！之後導賞員就會教我哋如何正確摸魚，主要只用食指和中指接觸魚的背部，當然唔好嘗試抱起或捉住魚。亦提到已經將魔鬼魚有毒嘅刺除去。當日連日本傳媒都來拍攝，話唔定深導遊已經上鏡！

可以摸小鯊魚同小魔鬼魚，超興奮！講真，如果唔係有呢個活動，成世人大概都冇機會接觸佢哋。


摸完發覺魔鬼魚好滑，鯊魚就好「嚡 」，而且魚兒係任摸唔嬲的。 大概一個回合玩15分鐘，想再玩就可以再排隊玩，深導遊就玩咗兩次！

摸完魚，隔籬就有得睇企鵝，企鵝池將成年企鵝與小企鵝分開，企鵝們都好得意！  呢個BB真識嘆 ！

行到最後，就會見到food court，有熟食之外，當然唔少得甜品雪糕啦！行完成個水族館，以雪糕為總結就正喇！

終於，以睇得好仔細嘅速度，用兩個半小時玩完水族館。可以行埋自然教育徑，沿路有日本鶴同淡水生物館。大概15分鐘的路程。

行完出番葛西臨海公園，仲可以坐遊覽車睇全個公園。 

車程25分鐘，每人300円，亦有時段限制。

司機會帶你睇晒整個葛西臨海公園，沿途會見到有人跑步、野餐，又有大草地，仲有摩天輪（摩天輪夜景很出名，可惜我哋沒有留到晚上）！還有好多日本人踩單車，不過搵唔到地方可以租單車。

總括而言，葛西臨海公園環境舒適，地方又大，可以用上一天時間享受！
或許不是趕行程的人會喜歡的景點，但的確是個令人很舒服的地方，尤其是天朗氣清的日子！: D

東京都葛西臨海水族園
地址： 郵遞區號：134-8587 江戶川區 臨海町6-2-3
交通： JR京葉線「葛西臨海公園」車站 步行5分鐘／東京Metro地鐵東西線「葛西」車站・「西葛西」車站 都營巴士「葛西臨海公園」車站下車 步行5分鐘
入場時間： 9:30am～5:00pm（入園券銷售到4:00pm為止）
休館日： 星期三
費用： 一般人士：700円 、中學生(13-15歲) ：250円 、65歲或以上：350円