因為愛染祭本身唔係一個好大型嘅祭典，加上之前又沒有參加過日本夏祭，所以之前都唔知愛染祭係咩來！
原來，愛染祭有好多唔同攤位，有嘢食又有嘢買。
日本人咁有創意，當然唔少得非一般的攤位遊戲！例如撈蟹仔、釣海鰻！殘唔殘忍就見仁見智，不過日本小朋友真係幾有膽色，赤手空拳捉住條海鰻都夠膽！釣到的話會即時劏魚，俾參加者帶走，可以返屋企整個鰻魚飯都唔錯！
怕血腥的話都有好多不同的選擇，例如釣福袋！福袋明明買就可以啦，偏偏要小朋友用竹竿『釣』福袋，簡單招數就可以哄小朋友開心！
仲有攤位賣煙花，其實在日本普通便利店都能買到煙花，不過攤位賣的煙花種類較多，而且有好多我見都沒見過！
除了玩、買之外，還有食！我就忍唔住買左炸雞，因為我一開心就鐘意食煎炸食物！日本伯伯仲送多左一舊大嘅俾我！亦有比較特別的煎蛋蝦餅，只係２００円，要抽籤睇下抽中有幾多隻煎蛋，我只抽到一隻！哈哈不過係抵食同特別！我見好多日本人都排隊買！
當然唔少得浴衣啦！愛染祭起源自穿浴衣的藝妓坐橋參拜神社，而本尊愛染明王是替魅力開運，促成良緣之神！所以好多日本人嚟愛染祭都會着浴衣！我都好後悔冇着酒店件浴衣去！哈哈！不過只係望到好多日本小朋友，穿起浴衣份外可愛就夠了！仲遇到兩位穿浴衣的小女孩，望落去好似兩個卡通人物！哈哈有沒有人都覺得似？
不過題外話，其實我都有個疑慮，上網查資料，見到以往愛染祭會有愛染娘坐橋到愛染堂的環節，更可讓民眾坐上橋上，但今年完全沒有這個環節，是為甚麼？？
現場亦有負責祭典工作的愛染娘。佢地係精挑細選下揀選出來先可以擔任，而且每年都會吸引好多龍友專程來影愛染娘！
仲有就係不同類型的舞臺表演，雖然我唔識日文，但睇到日本伯伯在臺上又唱又跳，好有氣氛！[開心][擠眼]
總括嚟講，愛染祭其實有少少似香港年宵的氣氛和感覺，是好熱鬧的喜慶日子，好適合一家大小，尤其是小朋友一定喜歡！當然，想穿浴衣和想祈求良緣的朋友都萬萬不可以錯過啦！
地點：四天王寺附近的愛染堂
日期：2016年6月30日（週四）～7月2日（週六）
入場費：全免，各攤位另收費
去片：