好多人都覺得,女朋友情緒好飄忽。呢一秒仲笑瞇瞇,下一秒就黑晒面。你唔理佢咩?佢又會話你唔關心佢。

其實要滿足女朋友個心好簡單,先要滿足佢哋個胃。女性身體構造特殊,佢個心臟就係佢另一個胃。就好似一個BB仔咁,一肚餓就會喊…

咩叫另一個胃呢?就係正餐飽到撐,用嚟放甜品嘅另一個胃。唔信可以試吓走入甜品舖,好少會見到女仔食緊甜品時候會黑面。所以氹女朋友開心最簡單嘅方法,就係醫飽佢個肚,綁架佢入甜品店,就會即時笑返。

好多年前,香港仲未興起抹茶味甜品,有次去日本旅行時,我介紹女朋友試吓呢種口味,點知佢話:「噫~隻色青BB咁好怪雞,茶味好似唔太襯雪糕咁。」

喺我威逼之下,佢試咗第一啖… 亦因為呢一啖,佢變成咗一個抹茶控!

現時香港周街都係聲稱由日本嚟嘅錄茶甜品店,女朋友作為一個「病態抹茶控」,無論雪糕、蛋糕、飲品、餅乾、百力枝、刨冰都會揀抹茶味。仲會每間都幫佢哋評分,分析吓邊間抹茶色夠濃,邊間雪糕奶味重啲,但可能我味覺有問題,其實我覺得間間都差唔多味…

「乜都抹茶味妳唔厭嫁咩?」

「證明我夠專一囉!唔似得你,成日試唔同味,我覺得抹茶味簡直係甜品界嘅萬能KEY!」

「痴線…」

而最搞笑嘅係,自稱係抹茶死忠嘅佢,前排去大阪旅行,佢另結咗一個新歡叫「紫薯」,佢話紫色嘅甜品好靚之餘,甜甜哋好易入口咁話。

雖然有時女朋友係好難理解,亦好難預測佢哋心情起伏。 但係你可以記住佢哋鍾意食乜,喺佢黑面扁嘴鼻孔噴火嘅時候, 奉上一啲佢鍾意食嘅嘢,填飽晒佢兩個胃,就咩脾氣都無晒啦。


ig:BlueGodZi

專頁:http://www.facebook.com/BlueGodZi