電視劇入面機師同空姐談情說愛的橋段,相信都迷倒過不少觀眾。你以為所有機師都好似「Cool 魔」咁?一到外地就晚晚同空姐食飯約會?80 後港產機師就出書講比大家知,航空界的真實面貌,究竟現實是否如電視劇般,好容易就同空姐發展關係呢?

01. 比翼雙飛 很容易?

機師同空姐要成功走在一起並非易事,不過在飛機上工作,每次上班都會認識多位未見過的俊男美女。而愛情其實都只是「數字遊戲」,相比在辦公室工作,的確有更大機會遇到意中人。但因為工作環境的關係,就多了一項不能忽視的因素-時間限制。因為⋯⋯你根本不會知道下次跟意中人一起再飛,要等到何年何月,所以一切都要快手。成功之後,情侶們多數都會不停調更,務求達到有工一齊返、有假一齊放的最高境界。

可惜機師空姐調更各有限制,即使可以一齊飛都很可能是一些爛機,以為可以同愛人去法國品嚐梳乎厘,最後可能去咗印度食咖哩。

02. 機會要自己爭取?無咁簡單

去到外站,乘坐公司安排的巴士前後,是機師邀約空姐的唯一時間。如果想同空姐有任何交流,就要在有限時間內採取行動,但機會是否爭取就一定會有?根據真實例子,大家到外站通常都是各自各精彩,所以一齊食飯只會淪為無其他事情做時的後備方案。反觀,有多個原因導致空姐空少們婉拒邀請,其中最大原因就是有鬼佬機師在場。

原因 1 : 大部分港產空姐空少都不想下班後仍要講英文

原因 2 : 試過與機師們食飯有不愉快經歷,例如無飲酒又要平均夾錢

原因 3 : 羊群心理,無人主動應邀,所以最終無人應邀

原因 4 : 受到外站沉悶及危險程度影響,空姐空少們會否單獨行動的意欲會不同,而當然與同事們一起食飯的意欲成反比。

03. 成功約食飯 方程式

為了方便計算在外站約空姐食飯的成功機會率,得到以下方程式:
C=B×D÷ (2G³+T+N)
C=成功機率
B=外站沉悶指數 ( 5 是最沉悶)
D=外站危險指數 ( 5 是最危險)
G=鬼佬機師人數
T=航班時間長度 (以小時為單位)

N=空姐空少人數

用羅馬做例子,航班時間大約 12 小時,沉悶指數為 1 ,危險指數為 2 ,若有兩名鬼佬機師,航班有 11 名空中服務員,約食飯成功機率是 5 %。如果是北京,航班時間大約 3 小時,沉悶指數為 2 ,危險指數為 3 ,若沒有鬼佬機師,航班上有 6 名空中服務員,約食飯成功機率就足足有 67 %。

由此可見,機師能否和空中服務員在外站食飯,基本上同機師本身無直接關係,至於機師同空姐是否好容易發展關係,大家就可以計計條方程式。唔係無機會,不過都唔係好似衝上雲霄咁容易。

《關於機師,我想說的其實是……》

作者:Mr. Pilot
出版:非凡出版
Facebook:Mr. Pilot