更新日期：2016年1月22日
注：以下所提及的價錢為來回連稅價錢，個別廉航未包寄艙行李費，以淡季作標準。價錢及建議是小編個人之經驗，只作參考用途。
最低價：過去一年以來嘅最平價錢，可遇不可求。
入手價：搵機票個陣見到呢個價都叫做唔錯，買得過。
正常價：平時無優惠做緊嘅正常價錢。
首爾：
首爾自上年起一路都進行緊減價戰，國泰、韓亞、大韓，三間出名質素好嘅航空公司任你揀，預早訂嘅話航班時間選擇好多。
尚餘三間傳統航空公司埃塞俄比亞航空、印度航空同埋泰國航空，價錢一向唔算特別平，可以唔洗睇。但有時如果係公眾假期出發，反而會有驚喜價！
至於廉航方面，有三間包寄艙行李嘅濟州航空、真航空、易斯達航空。濟州航空有凌晨機去晚機返，大約一個月一次優惠，入手價為$1,500至$1,700，包15 KG 行李，但要注意無得俾錢額外加行李，只能當超重計，每公斤$85，都幾貴。而真航空及易斯達航空只有下午去早機返嘅航班，除非無得揀先考慮。
而HK Express 一日有三對航班，成日都有優惠減價，約兩星期一次，入手價為$1,300 左右。
結論：
1) 想坐傳統航空嘅話，建議盡早買國泰韓亞大韓，而家呢個價都差唔多係最低價了。
2) 嫌唔夠平？捕實濟州航空及HK Express 嘅優惠，計返行李條數平多$500左右。
3) 而其他航空公司基本上唔洗睇。
釜山：
飛釜山玩得最盡嘅航班時間會係釜山航空及大韓航空，凌晨機去晚機返。大韓航空宜家有隻全年優惠，最平$2,300 左右，包行李及飛機餐，呢個價相當抵買。釜山航空一個月出一次優惠，價錢由$1,600至$1,900 不等，但平飛數目比較少。至於港龍，雖然宜家都有優惠，但航班時間為凌晨機去早機返，可以忽略。
HK Express 飛釜山時間為早去午返，優惠大約兩星期見一次，平飛數量同樣多，想最平飛釜山嘅話主打呢間啦！
結論：
1) 要搭傳統航空，而家買大韓。
2) 想平D就等HK Express 優惠。
濟州：
仲有另一個熱門航點濟州，直航傳統航空只係得港龍一間，價錢高企不下，但自從紅色警示之後都逼住出優惠，$2,600超級抵！另外亦可搭廉航HK Express 去，不過要凌晨機去朝早返，而且HK Express好衰次次都唔出優惠，最平個次都要成$1,500，所以$1,800已經值得入手。