【移民台灣】英國放寬BNO持有人移民規定,令移民英國、台灣成為近期熱話!如果有得揀,你會想移民台灣還是英國?而移居台灣5年的里奧叔叔,在香港居住了12年、美國住了4年、中國住了5年,現時他與家人在台灣住了5年,到底里奧為何會踏上移民台灣的路?

5大方法移民台灣 申請門檻及資產一覽

撰文:里奧叔叔|編輯:AY|圖片來源:移居台灣 真實生活@facebook、unsplash

如果有得揀,你會做台灣人還是英國人?

最近炒得最火熱嘅,相信係英國放寬港人持BNO居留英國嘅話題,對於已經成為台灣人嘅里奧好似又多咗個選擇咁!不過,如果萬一英國真係咁慷慨畀大家去做英國人,你又係咪真係會去呢?里奧就應該唔會喇!仲係比較鍾意做台灣人多啲!

移民台灣, 台灣移民, 移居台灣, 台灣移居, 台灣生活
移民台灣|居台港人親身經歷 揀移民台灣定英國?(圖片來源:unsplash/Aron Van de Pol)

香港居住了12年、美國住了4年、中國住了5年

為何會踏上移民台灣的路?

當然,呢個只係里奧嘅個人立場,里奧嫂睇到有關BNO嘅新聞都忍唔住問里奧:「雖然知道你鍾意台灣,但萬一真係可以帶兩個女去英國讀書,而你又有能力可以去生活,咁你又會點決定呢?」呢一下我真係停咗幾秒,猶豫咗一陣都係唔知點答佢,主要原因唔係考慮自己咁簡單,但最後都係答no!最後呢個話題就成為咗里奧同太太尋晚嘅傾偈話題。

延伸閱讀:居台港人分享親身經歷 移民台灣8年遇到的5大適應問題

移民台灣, 台灣移民, 移居台灣, 台灣移居, 台灣生活
移民台灣|為何會踏上移民台灣的路?(圖片來源:unsplash/Charlein Gracia)

西方國家好嗎?相信每個人嘅睇法都唔同,亦唔會有一個標準答案,但自己就有咁嘅體驗,我曾去過美國加州讀過幾年書,讀書時期「冇王管」,每晚約埋班朋友喺UC Berkeley 飲住cappuccino做功課,做完就走去機舖打番幾鋪《街霸II》,Friday night 就例牌有party,周末遊車河,冬天去Lake Tahoe 滑雪,夏天就海灘曬太陽,都不知幾爽,冇錢就走去餐館打幾日黑市工(留學生不能工作),嗰時嘅里奧覺得美國先係自己嚮往生活嘅地方,但讀完書又入唔到美籍就只能夠返香港,當時自己有一個信念:有朝一日,我一定會移民美國!

移民台灣, 台灣移民, 移居台灣, 台灣移居, 台灣生活
移民台灣|為何會踏上移民台灣的路?(圖片來源:unsplash/Frank Mckenna)

返到香港之後,誤打誤撞咩工都試下,最後入咗一間中港生意公司,再被公司派到中國西南區長駐,一去就5年。當時因工作關係對中國式嘅生活同做事方式都算了解,晚晚收工咪被安排食飯飲酒,識人就係最主要嘅工作,日復日年復年,好彩當時年輕力壯,否則可能中酒精毒去咗極樂。時事方面,最記得法輪功事件悶咗成個星期,點解?因為全中國嘅電視台全日都只係播法輪功嘅新聞,而且播足一星期。

移民台灣, 台灣移民, 移居台灣, 台灣移居, 台灣生活
移民台灣|為何會踏上移民台灣的路?(圖片來源:unsplash/Samantha Gades)

為了孩子移民台灣

5年真係一個唔短嘅日子,再返到香港之後,里奧都好唔習慣,而且朋友都覺得里奧當時國產味好重,「早上好」、「服務員」、「打車」、「打的」 嗰D詞彙出晒嚟,好唔容易再次融入香港生活。但結婚生女後,就感到香港赤化愈嚟愈重,加上自己喺中國內陸長駐過,一場雨傘運動就決定帶埋家人離開香港,移民台灣。

移民台灣, 台灣移民, 移居台灣, 台灣移居, 台灣生活
為了孩子移民台灣。(圖片來源:unsplash/Jayzel Florendo)

里奧喺香港住咗12年、美國住咗4年、中國住咗5年、台灣住咗5年。如今40出頭,如果再畀我揀,我相信都係會揀台灣。

移民台灣, 台灣移民, 移居台灣, 台灣移居, 台灣生活
(圖片來源:unsplash/Joel Fulgencio)

台灣生活邊度好?

冇一個地方係完美,台灣都有唔少缺點,有時候睇到好多人分享台灣生活邊度好、咩福利正,里奧都未必好認同,簡單講過嘅情理法都已經覺得唔合理,但係有一樣自覺得好舒服嘅係「自在」。

台灣生活好自在,做生意做得好自在,交朋友亦交得好自在,呢幾年里奧多數與台灣人來往,從來都未有過咁自在嘅感覺,喺台灣生活唔會怕治安唔好,唔會怕醫療費高,唔會被種族歧視。做生意唔會有部門嚟搞你,除非你有把柄被人檢舉,唔使下下請部門食飯拉關係,交朋友又唔使下下斤斤計較,唔使打量別人用心,生活各方面都好自在。

如果係你,你又會點揀呢?

資料來源:移居台灣 真實生活@facebook

免責聲明:本專頁刊載的所有移民資訊,只可作參考用途。讀者在作出決定前理應審慎,若不幸招致任何損失,概與本刊及相關作者無關。而本集團旗下網站或社交平台的網誌內容及觀點,僅屬筆者個人意見,與新傳媒立場無關。本集團旗下網站對因上述人士張貼之資訊內容所帶來之損失或損害概不負責。

延伸閱讀:移民台灣|居台港人分享親身經歷 移民台灣8年遇到的5大適應問題

移民台灣, 台灣移民, 移居台灣, 台灣移居, 台灣生活