【移民英國】個個都想移民英國，不過手頭資金卻不爭氣，或者大部分資金正在投資或轉為物業。再考慮到英國當地財政、稅務等問題，真係諗到頭都爆！facebook blogger「抗疫爸爸」於英國居住了8年，近日分享了部分港人最關心的移英資產配置問題，提出三個處理資金方法，並略提英國稅務必知資訊。

撰文：抗疫爸爸｜編輯：CY｜圖片來源：unsplash

移民英國｜教你用盡免稅額！移英港人常見3大資產配置攻略｜附稅務資訊

我諗好多30至40歲，有BNO有細路嘅朋友，都諗緊申請BNO visa去英國，第一個問題就係去到英國夠唔夠錢玩6年，所以就打算大家討論下財政、稅務及資產配置等錢銀問題。

假設你：
30至40歲嘅夫婦，假設你哋兩個都有返工，層樓供咗5至10年，樓價升咗5成至1倍，仲有幾十萬，甚至過百萬資金同MPF，有2至3個細路讀緊書。當你會去啲二、三線城市搵中產區住，等個細路去啲正常公立學校讀書。因為冇得請外地傭工，就需要一人睇細路，一人出去搵食。

移民英國, 移居英國, 英國稅務, 移英資金, 對策 — 移民英國｜（unsplash@miteneva）

方法1. 太空人大法

唔賣樓，一個人繼續留港，搵錢畀居英嘅家人，直到香港冇得撈先過去英國。

好處：

香港收入不用交英國稅，香港層樓仲可以租埋出去玩以租代供，一來博升值，二來萬一英國住唔慣仲可以返香港，進可攻退可守，再租間劏房住又慳一萬幾千。

壞處：

家人兩地分離，唔係成個家庭完整過英國，唔知批唔批BNO visa。而且香港層樓在joint property rule下，一半租金收入可能都要報英國稅（未必過英國個人免稅額），遲下賣香港樓要交英國capital gain tax (CGT)。

方法2. 收租食息 —— 港樓港股

香港層樓出租，有餘錢買股票收股息，全家過去英國生活。

好處：

港樓租值高，但扣除供樓後是否足夠支持在英生活？如果淨租金夠高，喺英國炒下散就得，生活無憂。

壞處：

人在英國，身家在香港，萬一有意外就total loss：香港租金/股息/利息收入一樣要交英國稅，香港層樓並非英國稅法下嘅main home，遲下賣香港樓要交英國capital gain tax (CGT)。

方法3. 賣樓過英炒散度日

賣咗香港層樓，去英國炒散度日。

賣咗香港層樓清咗按揭，當你坐夠監唔使畀SSD（額外印花稅），計埋升值，少則收番有二、三百萬，多則有四、五百萬，加埋手上嘅流動資產同MPF，應該再多一、兩百萬。

咁多錢夠你去英國二、三線城市買間細屋，仲有錢剩去買股買債收息，又或買多層英國樓收租，得閒炒下散幫補下，最好其中一人搵到份full-time做。

好處：

賣咗香港層樓先去英國，香港賣樓唔使交英國capital gain tax (CGT)，英國買嘅住所係main home，將來亦唔使交capital gain tax (CGT)，慳好多。
買咗英國樓自住，就唔使賺錢去交租，少咗收入就變相交少咗英國稅。

壞處：

你要有好大舊錢去買樓收租同投資賺息先得，一開波去買樓，人生路不熟，買錯地方就慘喇！而且租金回報率要減埋地方稅同埋維修雜費，未必有3%。

英國稅項簡介

你住得喺英國就要交稅。

英國利息/租金收入計入個人income tax內，個人收入首12,500英鎊personal allowance免稅，之後收20%，超過50,000英鎊收40%，如夫婦其中一人收入低過個人免稅額12,500英鎊，英國嘅marriage allowance最多畀你轉1,250英鎊去你嘅伴侶度作減稅用。

利息收入（包銀行存款、國債/公司債、基金）在personal allowance上仲有額外免稅額5,000英鎊（starting rate for savings）及1,000英鎊（personal savings allowance）。股息另外計，首2,000英鎊免稅，dividend tax rate 7.5% （37,500英鎊以下）。

Capital gain tax (CGT)，賣樓（28%）賣股（20%）都要畀。不過CGT都有免稅額，一年有12,300英鎊，基金只有6,150英鎊。仲有地方稅council tax同NHS surcharge，冇收入都要畀。