出發前必睇 5大安全行山禮儀
雖然親親大自然係件好事，但都要切記做好以下5大事項，避免增加感染風險之餘，亦都要愛護大自然，做個有公德心嘅郊遊人士！
1. 一定要戴好口罩！如果去人多嘅熱門行山徑，記得全程戴口罩保護自己，亦都保障其他人。
2. 要愛護大自然，記得帶走自己嘅垃圾同用過嘅口罩，避免放入沿途嘅垃圾桶，以免動物摷垃圾桶。
3. 除低口罩前，留意附近有冇人經過，避免咳、吐口水同埋大聲說話呢啲會產生飛沫嘅行為。
4. 如果見到有跑山友正由後面跑上嚟就避免回頭望，只要向左右移開就可以，因為跑山友們大力呼吸會產生較多飛沫。
5. 可以選擇嘅話，就暫時避免去高危多人嘅4大徑、郊遊徑、獅子山、九徑、太平山、坪/長/南/東/塔/蒲等島嶼。
駕駛人士首選 3條輕鬆郊遊路線推介
路線1 : TKO Spot→將軍澳單車公園/運動場→將軍澳南海濱長廊→將軍澳運動場→TKO Spot
時間：1.5 小時
難度：0（0為最易，5為最難）
第一條路線比較適合即興嘅朋友，無論係想野餐、踩單車、跑步都可以，啱晒假日想過悠閒時光，但又唔想去太遠嘅朋友。而呢條路線最正嘅係可以咩都唔使準備，事關需要嘅物資都可以喺全新優化嘅TKO Spot解決晒！TKO Spot有全港最大嘅運動用品店，可以買野餐墊去將軍澳運動場外嘅草地野餐，夠晒chill～想踩單車嘅朋友又可以去將軍澳單車公園，館內仲可以租埋單車，沿住單車徑一直踩到海濱長廊，呼吸到新鮮空氣之餘，仲可以欣賞埋一望無際嘅無敵海景添！
唔識踩單車嘅朋友係咪就冇得去？當然唔係啦！海濱長廊好適合一眾跑手練跑，飽覽無敵海景之餘，仲可以望到對岸鯉魚門、杏花邨同埋小西灣嘅景色。呢段時間仲可以欣賞到香港單車館公園旁嘅櫻花，去散步賞花都夠晒relax！補充少少，香港單車館公園現時有9棵台灣品種嘅鐘花櫻桃，以及2棵日本品種嘅山櫻，3月中就係佢哋盛開嘅季節，而家去就係景色最靚嘅時候喇！
路線2 : TKO Gateway→轉16 號小巴往布袋澳→五塊田→清水灣二灘→釣魚翁郊遊徑→布袋澳→ TKO Gateway
時間：3.5 小時
難度：3 （0為最易，5為最難）
另一條由將軍澳出發嘅路線就去遠少少，不過全程都只需大約3.5小時，一個上晝或下晝就搞掂！大家可以先喺TKO Gateway泊好架車，再喺商場內嘅food lane「掃街」醫肚，嗰度有逾20間人氣食肆任你揀㗎！
食飽就正式出發，先搭16號小巴去布袋澳方向，喺五塊田站落車就可以開始行山！呢條郊遊徑唔單止可以眺望大廈林立嘅將軍澳同坐擁大自然靚景嘅西貢，到達峰頂仲可以欣賞埋清水灣岸一帶同果洲群島，有山有海又有樹林，打卡一流呀！
不過，呢條路線有少少難度，部分路段比較斜同有碎石，可能需要用手輔助，大家欣賞靚景之餘，都要注意自身安全。回程喺布袋澳小巴站搭16號小巴就可以返到TKO Gateway攞車離開，非常方便。
路線3 : 天澤商場→淋坑山→T Town / 天澤商場
時間：30分鐘 （山腳至山頂）
難度：0 （0為最易，5為最難）
最後一條路線就係喺天水圍！呢條路線最啱一家大細去親親大自然，事關淋坑山只有81米高，30分鐘就可以行到山頂，可以話係零難度！
首先揸車人士可以泊低架車喺天澤商場，順便買定少少乾糧同水，方便上到山頂可以一邊食住小食一邊睇靚景。
前往淋坑山嘅方法相當簡單，喺天澤商場中間有條直路，而前方有條小橋，過去對岸就係目的地—淋坑山！當行到馬路嘅另一邊，就會見到左手邊有個入口，穿過爛地就正式開始上山。雖然部分路段比較斜，但有一級級嘅石階，行起嚟都唔算困難，小朋友都應付得到。到達山頂除咗可以360度飽覧天水圍、后海灣同流浮山嘅靚景，仲可以喺度放住風箏等睇日落，超寫意！睇完日落就可以慢慢落山，再去天澤或者T Town食埋晚餐先攞車離開。
限時優惠！消費滿$200即享額外3小時免費泊車
睇完3條咁吸引嘅路線，係咪好想即刻出發呢？揸車嘅朋友有福了，皆因而家TKO Spot、TKO Gateway、T Town同天澤商場都有限時泊車優惠，只要喺場內消費滿$200，而其中一張消費單據係由商場內任何一間食肆簽發，即可額外享泊車優惠3小時，啱晒一眾車主呀！
(Presented by Link)