我哋同乘客第一個「衝突」嘅時刻,一定係登機嗰一刻,因為自某日開始,我哋需要喺飛機門口檢查登機證之後,乘客經常性都覺得自己知坐邊度,覺得我哋侮辱佢哋嘅智慧,兼且麻煩佢哋要再攞出嚟,所以企喺門口登機嘅同事,基本上登機嗰廿分鐘已經可以令到三分一乘客「嬲豬」。
港男:「我梗係坐呢班機,我做咩要畀你睇!」
不過呢,要知道點解我哋要睇你登機證呢?因為我哋要確保你真係坐呢班機,最大嘅concern都係安全,唔希望有啲唔係坐呢班機嘅人走咗上嚟,所以安全上嘅職責,我哋真係有絕對嘅權力去檢查,唔畀我哋睇,就會有以下嘅下場。

阿姐:「阿仔,幫我去問個客攞登機證,佢衝咗入嚟。」
我:「先生,麻煩出示番登機證吖,因為我哋要確保你係坐呢班機。」
香港男人:「我梗係坐呢班機,我做咩要畀你睇!」
我:「先生,呢個係安全條例所要求,麻煩你出示。」
