可能好多人都對飛機餐有份期待,覺得係有真人喺廚房煮出嚟。的確,某啲航空公司嘅頭等商務艙係嘅,不過經濟艙嘅,就一定係喺機場空廚中心煮咗,然後雪住佢,運到上嚟就用焗爐整番熱佢,所以,可以講係冇變化可言!

上次飛咗班機,個香港後生仔乘客令我哋大家都好無言!

乘客:「我要蛋啊!個蛋轉炒蛋!」

我:「早晨啊先生,早餐有個焗蛋餅配腸仔,另外一款係柴魚花生雞粥。」
後生仔:「我要蛋啊!個蛋轉炒蛋!唔要腸仔,可唔可以要其他嘢?」
我:「先生,我哋冇得轉嘅!個餐已經煮好咗,一係蛋餅一係粥,你唔鍾意蛋餅,可以試下雞粥。」

後生仔:「吓!唔係即煮呀?」
我:「係啊!喺香港個空廚中心煮咗攞上嚟嘅,所以啲嘢轉唔到嘅。」
後生仔:「雞粥個餐配咩?有冇腸粉或者油炸鬼?」
我當堂黑人問號,到底係佢第一次坐飛機唔知定係搞事呢?
我:「嗯,係配餐包嘅。」
後生仔:「嘩!有冇搞錯啊!你哋咁大部飛機要咩冇咩嘅?部飛機裝咩呀?」
我:「嗯,都幾大嘅,裝咗三百個客同十六個crew,仲有行李!咁你食蛋餅定雞粥呢?」
後生仔:「冇炒蛋,太陽蛋得唔得?」

無限輪迴⋯⋯

最恐怖莫過於無限輪迴,我相信我再同佢講落去,就會好似睇麥兜食常餐咁,講到降落都未搞掂,所以我又用番我嘅慣常技倆。
我:「先生,係冇嘅!蛋餅或者雞粥,你諗好之後,我轉頭返嚟。」
一擰轉面。
後生仔:「食蛋啊!飲熱菜蜜。」

What the …
好彩派嘢飲係另外一個同事,然後佢又無限輪迴咗一個世紀!!!
提提大家,飛機資源有限,想要其他嘢歡迎你問,有嘅嘢我哋畀到都會畀,但如果我哋解釋咗冇,就真係冇,你無限輪迴都冇用,因為答案同真相都只有一個,
就係:
「真係冇啊大佬!」