有時候有啲貴客唔知自己想要乜嘢已經夠恐怖，再加上答非所問，同埋極短嘅飛行時間，我真係想崩潰！！！
案件1：選擇困難症
由曼谷飛返香港，好多時都係飛兩粒鐘，扣埋起飛降落時間，可能得一粒鐘時間派餐，某啲機型我哋一個人派一百二十幾個餐，其實真係唔係幾夠時間，撞正啲貴客，真係會好躁底！我哋立即案件重演吖不如～
我：「哈囉，我哋有泰式豬肉飯同埋咖喱雞飯，想要邊個？」
貴客：「呀？好呀！」
我：「豬肉飯定雞肉飯呢？」
貴客：「ＯＫ呀！」
我：「唔係呀，豬定雞？二揀一。」
貴客：「哦，咁呀！有咩揀？」
我：「豬肉飯定雞肉飯呢？」
貴客：「有冇魚？」
我：「得豬同雞，或者你諗下先，我轉頭返嚟。」
貴客：「雞。」
對付諗食邊個餐好似賣樓揀老公老婆嘅貴客，我哋最有效嘅方法就係叫佢諗下先，因為當你一擰轉個頭，佢就會即刻諗到。就算佢真係諗唔到，到最後你派晒得番一款揀，咁佢咪唔使揀囉係咪？
案件2：「唔係雞飯我唔食啊！」
講起冇得揀，有啲貴客對於飛機餐係有一份執著，如果冇得揀，面上不期然會流露住一絲絲哀愁，繼而眼入面帶住一份仇恨，覺得係我收埋個雞飯唔畀佢食，有如我割咗佢哋一忽肉！我哋又去睇下～
我：「哈囉，唔好意思呀！今日晚餐係泰式豬肉飯，另一款雞肉冇晒喇！」
貴客：「吓！冇雞？」
我：「係呀！唔好意思呀！」
貴客：「即係冇得食呀？你哋會唔會仲有呀？」
我：「唔好意思呀！我都啱啱返廚房睇過，真係冇晒喇！」
貴客：「吓！係咪你哋自己想食，所以收埋咋？點解會冇晒嘅？」
我：「因為前面個個食雞，所以冇晒。同埋呢，我哋都唔會有時間食嘢，所以都唔會咁得閒收埋個雞飯。」
貴客：「吓！唔係雞飯我唔食啊！」
我：「明白，咁我唔打擾小姐休息。」
當一擰轉個頭，佢就決定食呢份豬肉飯。
大家要明白，我哋唔會咁得閒收埋唔畀你，有就有冇就冇。同埋呢，如果你要怪，就怪前幾行嘅客食咗你隻雞啦！
今個月慶幸唔使再飛Bangkok，唔使再為雞飯而煩惱。