坐飛機其中最令人頭痛嘅問題,應該係附近嘅BB喊,有時候唔係一個喊,最高紀錄五個BB一齊喊,真係高空交響樂咁樣,極震撼!

臨時拉伕化身「空中奶爸」

飛咗幾年,有啲媽媽一個人帶住個小朋友飛,始終人有三急又唔想帶佢去廁所,我惟有臨時拉伕化身「空中奶爸」幫幫手,唔多唔少都學識少少湊仔貼士。最近飛咗班機,由起飛開始,我哋坐咗半粒鐘先可以起身做嘢,坐我個位對面,有個好可愛嘅香港BB,一路起飛都好正常,但點知十分鐘後喊到收唔到聲,成機人都開始有少少唔耐煩喇!

喊咗15分鐘之後……

我:「小姐,BB係咪要食奶奶啦?」

媽媽:「係啊,但喺行李櫃上面。」

嬰兒搭飛機

拆解BB上機喊唔停之謎

為咗餵飽個B,我都唔理得個安全帶燈號。當然一有奶奶食,成個客艙就重回一片寧靜。

媽媽餵奶嘅同時就問我:「點解你知佢肚餓嘅?你都有小朋友?」

我:「靠經驗同估咋!第一,如果佢起飛緊就喊,咁一定係氣壓搞到耳仔痛;第二,佢如果係瀨咗,媽咪應該會知;第三,如果扭眼瞓,冇可能喊咁耐,應該喊喊下就攰到瞓著咗;所以我就估佢係肚仔餓啦!」

嬰兒搭飛機

與嬰兒搭飛機小貼士

所以喺度畀少少tips啲爸爸媽媽,BB喺起飛降落嘅時候耳仔痛係唔識吹氣,記住畀奶嘴或者畀嘢佢哋飲。然後買機票嘅時候,有需要可以試下訂bassinet seat(嬰兒籃位),至少唔使抱住個BB成程機吖!當然我哋冇奶粉,不過,如果真係有需要,我哋都有限量嘅鮮奶(雖然唔啱BB飲,但好過冇),可以問下我哋。但最重要嘅係,如果有咩需要幫手,記住同我哋講啦!

PS:只要你唔介意畀BB同我玩,我係好樂意幫你㗎!

嬰兒搭飛機
嬰兒籃會放喺機艙第一排。

下一頁:最後一程 | 病重乘客:「呢程好可能係我人生最後一程長途機,多謝你哋照顧我。」

相關文章