去旅行可以更了解當地文化,但作為旅客,一定要遵守當地文化規矩,咪諗住畀錢消費就當自己大爺。不過,有啲當地文化同香港截然不同,我哋以為理所當然嘅事,原來喺當地嘅禁忌!所以去旅行前,真係要睇清楚。

圖片來源:新傳媒資料庫、Unsplash

1.日本街頭小食,忌邊行邊食

雖然唔係每間街頭小食都有規定,但問過一位日本朋友先知,原來日本人即使係街頭小食,都好少邊行邊食。

以吸煙為例,佢哋都唔會做「火車頭」,而係行去指定吸煙區。較多人嘅旅遊景點例如雷門,街道兩旁嘅小食雖然非常吸引,但大家都會企喺店舖門口食完,先繼續行。

有次我去食一間雪糕店,諗住買完就走,點知老闆衝出嚟叫停我,叫我企喺門口食完先離開。呢個習慣同香港剛好相反,好多店主都希望客人買完就急急腳離開,唔好阻住做生意。

日本人即使係街頭小食,都好少邊行邊食。(圖片來源:新傳媒圖片)
日本人即使係街頭小食,都好少邊行邊食。(圖片來源:新傳媒圖片)

2. 韓國人喜歡隨地吐痰

平時喺香港成日見啲阿叔喺公園吐痰,估唔到韓國呢種「吐痰文化」不論男女老幼都非常流行,尤其係接近深晚時間,可能好多人都飲完酒,比較容易痰上頸。我見過就連著西裝嘅年輕男士,吐痰技巧都非常純熟。除咗痰之外,仲特別多嘔吐物,大家去韓國時,夜晚真係要小心啲。

估唔到韓國呢種「吐痰文化」不論男女老幼都非常流行。(圖片來源:新傳媒圖片)
估唔到韓國呢種「吐痰文化」不論男女老幼都非常流行。(圖片來源:新傳媒圖片)

3. 美國高昂小費

去美國食飯最肉痛嘅就係畀小費,如果係比較正式嘅餐廳,都會建議最少畀全單費用嘅15%作為小費。以美國嘅高消費嚟講,隨時畀小費都冇咗一嚿水。

以美國嘅高消費嚟講,隨時畀小費都冇咗一嚿水。(圖片來源:Corinne Kutz @Unsplash)
以美國嘅高消費嚟講,隨時畀小費都冇咗一嚿水。(圖片來源:Corinne Kutz @Unsplash)

喺香港食飯找續時,可能會將全數硬幣作為小費。但喺美國就千祈唔可以畀硬幣,連街頭表演者都一定要畀紙幣,因為畀硬幣係一種視對方為乞丐嘅表現。

不過美國人似乎已經非常習慣畀小費,我見好多人連買杯咖啡都至少會畀US$1作為小費……恕我比較吝嗇,每次食飯,我畀小費時都非常肉赤……

美國人似乎已經非常習慣畀小費,好多人連買杯咖啡都至少會畀US$1作為小費。(圖片來源:alschim@Unsplash)
美國人似乎已經非常習慣畀小費,好多人連買杯咖啡都至少會畀US$1作為小費。(圖片來源:alschim@Unsplash)