對於食嚟講，做香港人真係好幸福。想食拉麵，銅鑼灣有大把選擇，想食西餐廳或壽司，周圍都係，想食泰國嘢又可以去九龍城。一個小小嘅香港，幾乎集合晒全球美食。
去完旅行，發現香港餐廳非常高水準
有時候我去完旅行，都會有一種感覺，原來香港嘅外國餐廳水準非常高，以我個人口味而言，除咗泰國之外，冇乜其他國家煮泰國菜好食過九龍城（亦因為九龍城好多餐廳都係泰國人開）。
每次去外國長途旅行，都會好快食厭當地嘅餐廳，特別掛住香港嘅食物。食咗咁多餐pizza，就好想食番碗譚仔！食得多美國嘅早餐店，唔係pancake就係煙肉煎蛋，就會好掛住香港茶記嘅沙爹牛麵……
但如果去到外國，如歐洲國家想食壽司，見到迴轉壽司竟然有燒賣同蝦片、有九成壽司都係熟食手卷，就更加會覺得喺香港食日本菜，除咗日本之外，都算數一數二。
喺香港長大，飲食習慣真係冇得呃人……
想食中餐，就算去到唐人街，可能要迎合外國人口味，中餐質素都唔及香港，大部分食物都偏鹹同油膩。雖然口味各人有異，但即使係滿口英文嘅「偽ABC」，只要喺香港長大，飲食習慣都真係冇得呃人……
每次去十幾日外國長途旅行，最大嘅問題就係……好難大便！
好想食清淡嘅烚菜，但外國大部分嘅蔬菜只得沙律。想飲碗媽媽牌滋潤嘅老火湯水，外國只得「杰躂躂」到醬汁咁嘅忌廉湯。
雖然稱唔上「世界第一」，但仍值得香港人去欣賞！
無論同朋友定屋企人去旅行，總係會討論一個話題：「返到香港最想食乜？」
雞煲、茶記、點心、譚仔、打邊爐……其實香港有好多比其他國家出色嘅地方，例如鐵路，雖然港鐵又加價又壞車，但當見識過巴黎地鐵充滿尿味嘅車廂、完全唔user-friendly 嘅買車票機、美國紐約幾乎完全冇裝潢嘅車站，比起好多國家，香港鐵路已經算衛生乾淨同埋準時。
但只係我哋太習以為常，所以平時感受唔到。去旅行的確可以令我哋見識到大世界，但同時亦令我哋更感受到香港嘅美好。即使有好多需要改進嘅地方，亦未去到全世界第一名，但都值得我哋香港人去欣賞。