之前講過,如果飛長途航班的話,特定機型係會有機組人員休息室畀我哋輪流休息;至於中長途嘅航點,例如係印度、澳洲同埋中東,因為用嘅飛機相對細少少,冇地方安放休息室。所以,如果航班唔滿的話,通常地勤嘅同事都會將機尾嘅最後三行窗口位留起做休息嘅地方。要知道,即使我哋用簾遮住呢幾行,都總會有人坐落去。而另一個最大嘅問題就係噪音!因為佢只係一個普通嘅客位,一簾之隔,如果撞正一個「大聲公」,基本上可以望出窗外數星星。

飛機大媽 手機播〈康定情歌〉跟住唱⋯⋯

去杜拜嘅航班上面,除咗係去打工嘅菲律賓人之外,大部分都係來自中國內地嘅大叔大媽。大家都知佢哋中氣十足,相信估到會發生咩事啦!

終於輪到我休息,但瞓瞓下,點解好似有音樂聲嘅?望下又唔係自己部電話,又唔係隔籬個同事喎!聽清楚少少,係前一行傳過嚟。

「跑 馬 溜 溜 的 山 上,一 朵 溜 溜 的 雲 喲!」

咩料呀!大媽一路播一路唱埋一份喎!你估你去咗唱K咩,同事即刻彈起身去教育下佢先!

咩料呀!大媽一路播一路唱埋一份喎!你估你去咗唱K咩! | 圖片來源:《東張西望》擷圖

同事:「阿姨,你在播音樂嗎?」

大媽:「是的,沒事兒。」

同事:「阿姨,有事呀!你不要再播喇!如果你要聽歌的,你用耳機吧!」

大媽:「沒事兒沒事兒,換個歌兒。」

救命呀!呢幾個可愛嘅大媽以為同事唔鍾意首〈康定情歌〉,意圖換第二首歌安撫同事,我為免佢整首歌唱祖國,我要出手喇!

「跑 馬 溜 溜 的 山 上,一 朵 溜 溜 的 雲 喲!」

大媽:「你睡不了,就跟阿姨們聊天吧!」

我:「阿姨,你不可以用擴音器的,會影響其他人的。」

大媽:「沒事兒沒事兒,附近的都是我們的朋友。」

我:「但我坐你後面休息,我睡不好就不能飛,不能睡就去不了杜拜的啦!」

大媽:「行行行!對不起,小伙子你睡不了,就跟阿姨們聊天吧!」

大媽:「行行行!對不起,小伙子你睡不了,就跟阿姨們聊天吧!」 |  圖片來源:《衝上雲霄》劇照

有時候大媽比香港乘客更可愛

其實大媽們好多時做啲行為出嚟,雖然真係好乞人憎,不過至少你解釋畀佢哋聽,佢哋會明白自己唔啱,仲會道歉。

但係香港人明知自己做錯,都仲要大大聲鬧番你轉頭,咁大家明白點解大媽喺飛機上咁受歡迎啦!

圖片來源:網易視頻

相關文章