之前講過，如果飛長途航班的話，特定機型係會有機組人員休息室畀我哋輪流休息；至於中長途嘅航點，例如係印度、澳洲同埋中東，因為用嘅飛機相對細少少，冇地方安放休息室。所以，如果航班唔滿的話，通常地勤嘅同事都會將機尾嘅最後三行窗口位留起做休息嘅地方。要知道，即使我哋用簾遮住呢幾行，都總會有人坐落去。而另一個最大嘅問題就係噪音！因為佢只係一個普通嘅客位，一簾之隔，如果撞正一個「大聲公」，基本上可以望出窗外數星星。
飛機大媽 手機播〈康定情歌〉跟住唱⋯⋯
去杜拜嘅航班上面，除咗係去打工嘅菲律賓人之外，大部分都係來自中國內地嘅大叔大媽。大家都知佢哋中氣十足，相信估到會發生咩事啦！
終於輪到我休息，但瞓瞓下，點解好似有音樂聲嘅？望下又唔係自己部電話，又唔係隔籬個同事喎！聽清楚少少，係前一行傳過嚟。
「跑 馬 溜 溜 的 山 上，一 朵 溜 溜 的 雲 喲！」
咩料呀！大媽一路播一路唱埋一份喎！你估你去咗唱Ｋ咩，同事即刻彈起身去教育下佢先！
同事：「阿姨，你在播音樂嗎？」
大媽：「是的，沒事兒。」
同事：「阿姨，有事呀！你不要再播喇！如果你要聽歌的，你用耳機吧！」
大媽：「沒事兒沒事兒，換個歌兒。」
救命呀！呢幾個可愛嘅大媽以為同事唔鍾意首〈康定情歌〉，意圖換第二首歌安撫同事，我為免佢整首歌唱祖國，我要出手喇！
大媽：「你睡不了，就跟阿姨們聊天吧！」
我：「阿姨，你不可以用擴音器的，會影響其他人的。」
大媽：「沒事兒沒事兒，附近的都是我們的朋友。」
我：「但我坐你後面休息，我睡不好就不能飛，不能睡就去不了杜拜的啦！」
大媽：「行行行！對不起，小伙子你睡不了，就跟阿姨們聊天吧！」
有時候大媽比香港乘客更可愛
其實大媽們好多時做啲行為出嚟，雖然真係好乞人憎，不過至少你解釋畀佢哋聽，佢哋會明白自己唔啱，仲會道歉。
但係香港人明知自己做錯，都仲要大大聲鬧番你轉頭，咁大家明白點解大媽喺飛機上咁受歡迎啦！