文章授權：花邊空姐｜圖片來源：花邊空姐、新傳媒資料庫、電視劇劇照
國泰截查空服員
因航派出「打包獵人」突擊抽查一班飛返香港嘅航班，全體機艙服務員踏出機門後，即被搜查個人行李。現場檢獲牛角包、牛奶、乳酪、水等等，涉事嘅數名機艙服務員有機會因為一支水、一個麵包而被解僱。
對機艙服務員的侮辱
成件事，講出來畀人聽，人哋都會覺得好黐線好可笑。但對於一位機艙服務員來講，呢個絕對係一個侮辱。因航有一項比大部分航空公司更短缺嘅，就係manpower。
經濟艙分分鐘係一個crew服侍60個大客。有時忙起上來，唔好話冇時間食嘢，有時忍尿忍到膀胱炎都未有時間去個茅廁。而「機艙服務員」呢份工作，係冇lunchtime/dinner time的。
機艙工作的實況
今次好彩做完嘢，有少少時間食個包，x你個乖呀又有人按call bell，嗰啖包仲頂住喺喉嚨未吞，就要仆出去應call bell，呢個要飲水、嗰個要多包花生……（call bell應遲幾分鐘，對於客人來講已經係等咗半世紀，會發脾四的，所以要狗衝。）每次應完一輪call bell，返到廚房，你個包、你個飯已經變咗凍包冷飯。即使有少少時間食飯，好多時都要鯨吞，因為你又要收拾機艙準備降落……
你唔信可以問問身邊嘅空姐空少朋友，10個人入面，有9個都係餓住個肚落機，剩低嗰1個係因為辛苦到冇胃口食嘢/食唔落嘢。放工後，想攞支水喺搭車唞唞氣時飲，被公司指控偷竊；返到屋企，想食番頭先喺飛機未有時間咬嘅牛角包同乳酪，被公司指控偷竊。而有多餘嘅牛角包、牛奶、乳酪、檸檬等等，就算冇乘客要食，亦冇crew帶離機艙食，亦都只係被當作廚餘掉到去垃圾堆填區。
公司真正的主要財產
因航擺到明就算要浪費食物+增加廚餘咁折墮，都唔會益你班crew。班膠層燃油對沖虧損幾百億，就冇人捉出來炒佢哋魷魚，但就走去捉喺前線幫你打生打死，只係攞你一支半支水放工飲，攞個牛角包返屋企食嘅機艙服務員，話影響到公司財產的數量出現落差，企圖炒人魷魚。我依家先恍然大悟，因航嘅經營理念：燃油對沖虧損幾百億、前線空服員的賣力，不是公司財產，真正的公司主要財產，是牛角包、是牛奶、是乳酪、是一支水……
