落葉歸根係好多人最後嘅心願,特別係亞洲人,即使離開家鄉多年,都希望能夠喺最後嘅日子返到去「家」,喺屋企人嘅陪伴下度過人生最後嘅日子,走過最後嘅一段路。正因如此,作為一間喺亞洲嘅航空公司,我哋不時都會有呢一類嘅乘客由外地經香港返去佢哋嘅家鄉。

病重乘客搭飛機返家鄉 過人生最後的日子

最近飛咗一班機由美國返香港,喺機場嘅時候,地勤同事攞住一疊文件,後來知道係一位印度籍嘅女士因為重病,希望返去印度過埋佢最後嘅日子。

但由於佢嘅病情已經去到末期,亦明白未必能夠捱到返印度,所以喺病人嘅同意下,簽咗一張「拒絕搶救」嘅證明:假若喺危急情況下毋須救治(實際情況嘅處理手法不同);不過因為係同人命有關,所以大家都好緊張咁處理!

全程呢位女士嘅家人同埋醫護都好細心咁照顧佢,希望佢能夠盡量休息,畢竟正常人喺飛機都未必休息到,何況係病人!而我哋就只能夠從旁配合佢哋。

最後一程長途機 或許再也不見⋯⋯

最終十四個鐘頭嘅機程終於完結返到香港,而呢位女士蒼白嘅面上亦都多番啲血色,落機嘅時候,安排佢坐上輪椅後,佢用佢微弱嘅聲音同我哋講:

「This is probably the last long-haul flight in my life. Thank you for taking good care of me and I wanna say Goodbye to you all !」

(呢程好可能係我人生最後一程長途機,多謝你哋照顧我。再見!)

或者知道佢嘅病情,佢嘅再見其實可能係「再也不見」,所以令到我哋大家嘅心情都好沉重。每次返工都會見到二百個以上嘅客人,冇人會知今日一別,會唔會有機會再遇上。

人生匆匆幾十年,珍惜當下擁有嘅人同埋事!

Tags :