成日都聽人講,香港人冇乜娛樂,所以先咁鍾意去旅行。點解香港人覺得香港冇乜活動?某程度上,原因係因為太多香港人鍾意炒賣,只要你諗得出,多人想得到嘅嘢,就會有炒賣情況出現!

「黃牛黨」炒賣演唱會飛 出價五位數字

演唱會相信大家都見識過,南亞人就最鍾意睇演唱會,就算佢哋唔識聽中文,知道有明星喺香港開演唱會都一定會捧場。最近韓國男團BTS嚟香港開演唱會,一班強國炒家出價五位數字,好多妹妹仔根本冇能力支付票價,到演唱會開場前一刻,炒家就喺班妹妹仔面前撕爛所有門票,令一眾支持者心都碎埋。

我有一位朋友,當日都有去到想買黃牛飛,但因為太貴而卻步!而佢喊到豬頭咁嘅原因,並唔係因為睇唔到演唱會,而係佢同其他粉絲都好驚,萬一被BTS見到會場入面咁多空櫈,可能會唔開心,甚至將來唔再嚟香港開演唱會。

最近韓國男團BTS嚟香港開演唱會,一班強國炒家出價五位數字。 | 圖片來源: 《South China Morning Post》

《復仇者4》戲飛被炒貴幾十倍

此外,炒iPhone炒波鞋炒模型大家都見得多,幾乎所有Hottoy嘅首日開賣訂單,都有炒賣情況出現。更黐線嘅係,最近《復仇者4》戲飛亦有人炒,真係唔講以為套電影剩係上畫一日……

更誇張嘅係,原來日本環球影城出現一啲受歡迎嘅精品,香港人一樣會買一大堆返香港炒。

最近《復仇者4》戲飛亦有人炒,真係唔講以為套電影剩係上畫一日…… | 圖片來源: UA Cinemas

圖片來源: UA Cinemas

連租借免費足球場的「場地紙」都有得炒!?

好啦!可能你唔鍾意買iPhone,唔鍾意買模型,又對演唱會冇興趣,睇戲可以遲少少睇嘅話,以為可以逃過炒賣嘅魔爪?!

錯了!因為就算你放假想約埋朋友踢場波,好多足球場連「場地紙」都被炒啊!話說小弟實在係孤陋寡聞,幾年前一直都係同班同事去踢波,有搞手約就出席,獻出身體同租場錢。去到最近我先知,原來好多硬地足球場都係免費!

去到最近我先知,原來好多硬地足球場都係免費! | 圖片來源:康樂及文化事務署

「咩話?!咁我次次出嚟踢波,點解仲要夾錢嘅?!」我問完搞手先知,原來好多本來係免費嘅場,都被人預早約好晒,再喺網上兜售。

呢種「炒場紙」嘅風氣仲已經流行咗好多年,但一直冇人去處理。我上網一查先發現,如果你係一般人去預約,只可以約到一個月後嘅場地。但如果你用註冊團體名義,仲可以預約三個月後嘅場地,亦即係話,就算你想提早約,都唔夠佢哋爭,屈你畀錢!

一張「場地紙」大約賣100~120蚊不等,網上亦有好多唔同區域嘅炒家,有部分地區誇張到連室內籃球場都炒埋。 | 圖片來源:維多利亞社區協會

靠大家自律真係可行?

雖然我哋成日都話「只要唔幫襯,炒家就會消失」,但諗深一層,以演唱會飛為例,如果係受歡迎嘅歌手,基本炒貴十倍。當佢買咗一百張飛,只需要賣10~20張已經可以回本,加上有外國嚟嘅粉絲幫襯,又有乜可能會蝕吖!

足球「場地紙」就更加誇張,本身係免費,無本生利,你唔買,佢都繼續霸住個場,除非你一世都唔租場踢波。所以要杜絕炒賣,除咗官方要捉得嚴,仲好靠大家自律,唔好做炒家,為咗賺少少錢而令歪風繼續落去……

但現實有冇可能實行到呢?問心啦,唉……

搵食啫!犯法呀?

下一頁:討論區熱話:「去旅行最唔鍾意嘅國家、景點」 | 遊客唔識欣賞就代表一文不值?

相關文章