飛機上面會經常性遇到好多大頭蝦,特別係臨落機前要填入境表時,就會發現本護照唔知去咗邊啦!又或者瞓醒後,至知部電話唔見咗,仲有係唔知副眼鏡去咗邊等等。

飛機離奇失物事件

當然我哋唔可以排除被「飛機老鼠」偷咗啦!但其實所謂嘅失物,不外乎係放咗喺個椅袋(seat pocket)入面,仲有係根本從來都冇喺個袋度攞過出嚟,同埋史上最神奇就係揸住咗同埋戴住咗,我哋只要沿著呢三大原因,通常都會幫大家搵番所謂嘅失物。

女乘客:「我唔見咗個胸罩呀!」

但係今班機遇到嘅,真係有啲難度,完全唔可以用呢3個原因去搵。長途航班商務客艙入面,大部分人都瞓晒,廚房都剩番我同另一位男同事工作,突然一位來自內地嘅女乘客按call light。

「叮!」

我:「X小姐,有咩幫到你呢?」

X小姐:「我啱啱起身,唔見咗個胸罩呀!」

我:「會唔會漏咗喺廁所或者係跌咗喺地呀?」

X小姐:「冇呀!」

終於搵得到,但估唔到佢跟住落嚟嘅要求係……

我:「咁會唔會你冇除到呀其實?」

估唔到呢位X小姐一手就摸落個心口度,檢查下係咪真係冇除到。

X小姐:「冇呀真係。」

最終惟有叫佢起身,將佢啲嘢攞起晒,再將張椅推向前,終於喺張椅後面嘅空隙發現佢嘅黑色「bra bra」,嗱嗱聲物歸原主,但點都估唔到佢跟住落嚟嘅要求係……

X小姐:「唔該晒你幫我搵番呀!不過我怕再唔見,你可唔可以攞個衣架幫我掛喺個位隔籬呀?」

老實講,點解有人會想喺公眾地方公然掛啲私人貼身物品出嚟?或者佢來自嘅國家思想較為前衛啩!希望佢下次坐飛機唔好再整唔見個「bra bra」啦!!!