【日本必買2019 日本便利店】春天又係賞花嘅季節,加上日本咁大,賞櫻熱點超級多!想一日趕幾個景點嘅話,真係分分鐘連好好坐低食餐飯嘅時間都冇。不過日本有樣嘢特別好嘅,就係總有一間便利店喺左近!趕唔切好好食飯嘅,仲可以買便利店食品醫肚,即睇日本網民有咩推介!

撰文:C |圖片來源:セブンイレブン、LAWSON、FamilyMart

日本便利店必買美食

1|7-11

#01 朱古力焦糖爆谷 138円/約HK$10

平時聽人講,食完甜嘢就想食鹹嘢,網友就話呢款零食絕對可以滿足呢個願望!因為有朱古力層,有咬口之餘,令到爆谷嘅味道更濃郁,又甜又鹹嘅味道,甚至被網友形容為「惡魔連鎖」!

#02 黃金炸米餅 170円/約HK$12

只使用日本國產食材用料製作而成,亦完全不使用化學調味料,製作非常講究。採用新潟縣產一等米,再用國產米油烹炸而成,共有鹽味及醬油味兩種口味。網友話食極都唔厭,食食下就冇晒,一包唔夠喉!

#03 黑朱古力脆餅 138円/約HK$10

脆餅較為硬身,非常有咬口,每一啖都充滿CP值!網友表示,又脆又硬嘅口感同恰到好處嘅甜味形成絕佳嘅平衡,黑朱古力嘅苦味變變滲透出嚟,變化至啱啱好嘅甜味,仲叫大家小心上癮!

#04 牛奶小泡芙 108円/約HK$8

日本7-11原創零食商品「牛奶小泡芙」只係108円(約HK$8)就買到!1袋60g,以白朱古力類作為餡料,製成牛奶風小泡芙。口感輕柔,餡料分量充足,牛奶香溢滿口腔。

#05「HIKAKIN POTATO」炸薯角 127円/約HK$9

由日本超人氣YouTuber・HIKAKIN大力推薦,隨後爆紅成為超難買斷市商品!網絡上更加炒賣到原價嘅3~4倍高額。HIKAKIN上傳嘅介紹影片播放數接近300萬,並因而令呢款零食有著「HIKAKIN POTATO」嘅別名。不過呢款零食係地區限定商品,只有東京、神奈川、千葉等地先至買得到!

2|LAWSON

#01 Silffon 200円/約HK$14

雪芳蛋糕上有一層北海道產嘅柔軟忌廉,網友話味道濃厚得十足十食緊雲呢拿雪糕,非常好食。而且糖分只有10g,就算係減緊肥但一時口痕想食甜品嘅女仔,都唔使怕食完會有「罪惡感」!

#02 期間限定!GODIVA合作款 1,080円/約HK$76

GODIVA同LAWSON嘅春季合作款,分為「櫻花味」及「抹茶味」,2個一set。除咗有洋式朱古力蛋糕,亦有和式求肥(類似於mochi)等5層構造。預計發售至3月27日,要食趁手喇!

#03 和式櫻花芭菲  285円/約HK$20

一款非常有春天氣息嘅櫻花甜品!從櫻葉抽取出「櫻葉萃取物」並加入到白豆蓉中,製成櫻花餡,再以道明寺、白玉同櫻花做topping,杯底則是滿滿的抹茶慕絲。

#04  吉士士多啤梨捲蛋  210円/約HK$15

同忌廉包名店「八天堂」合作推出嘅捲蛋蛋糕。吉士忌廉甜而不膩,再加埋酸酸甜甜嘅士多啤梨醬topping,網友都大讚好食!

#05  提拉米蘇忌廉班戟 270円/約HK$19

3層厚嘅彈牙班戟中,夾有以馬斯卡邦芝士製成嘅忌廉。然後再喺表層加多層cream,再加埋可可粉topping,班戟底仲有咖啡醬!十足十傳統tiramisu。CP值高得連網友都懷疑係咪真係只賣270円。

3|FamilyMart

#01 山賊燒炸雞扒  220円/約HK$15

「山賊燒」散發著醬油及蒜頭的濃郁味道,外皮炸得非常酥脆,好味之餘,口感都一流!日本網友話每日食都唔會厭,仲可以一塊送兩碗飯!不過據說係數量限定商品,見到就唔好諗,即刻落手啦!

#02 楓糖栗子 162円/約HK$11

將栗子肉用砂糖同楓糖漿調味而成嘅小食,楓糖係採用加拿大產楓糖漿。網友評價味道好似迪士尼嘅焦糖爆谷咁,非常好食!

#03 鯖魚飯糰 116円/約HK$8

鯖魚連皮一齊用明火燒,鎖緊鮮味。再從鯖魚乾提取高湯汁,令鮮味更加倍升級!使用嘅係日本國產鯖魚。網友話開頭見咁大隻「鯖」字,被吸引到先至買嚟試,點知一食就連續食咗3日,中晒鯖魚毒!

#04  惡魔朱古力蛋糕  268円/約HK$19

蛋糕為3層構造,表面係有咬口嘅曲奇碎,中層為柔軟嘅蛋糕,而底層則是彈牙嘅口感。網友話黑朱古力唔會太甜,甜度剛剛好,不過就真係有如同惡魔簽訂契約咁會上癮。

#05 士多啤梨芭菲 298円/約HK$21

5層構造可以食到滿滿嘅士多啤梨!士多啤梨慕絲係用鮮奶製成,口感非常creamy嘅忌廉慕絲。表面再加上一層由北海道產淡忌廉打發而成嘅鮮忌廉,奶味濃郁。網友話味道好清新,即使唔係特別鍾意食士多啤梨或紅莓呢種水果,都可以兩三下就食晒,好容易入口。

下一頁:「櫻花味」謎思|日本味覺協會:真花唔食得!味道嘅真身係⋯⋯

最新的日本入境要求詳情?

在入境日本前,建議先用Visit Japan Web完成一部分檢疫手續,便能更快速地入境日本,即睇使用教學,例如註冊步驟及同行家人如何填寫等,以及買定日本電話卡